O Lugo empata malia sufrir un penalti e unha expulsión (1-1)

O Lugo sumou un punto ante o Cartaxena nun partido en que o VAR volveu ser protagonista. Interveu en dúas ocasións en que os lucenses, a semana da protesta, non se viron beneficiados: un penalti marcado por Ortuño e a expulsión de Alberto Rodríguez. 

O primeiro tempo foi do mellor que se viu en toda a temporada no Anxo Carro. Un partido cheo de ritmo e oportunidades. Avisou o Lugo con remates de Zé Ricardo e Chris Ramos, e o Cartaxena respondeu dun xeito contundente despois dun penalti cometido por Neyder e transformado por Ortuño (m16). 

Non desesperou o Lugo, que empatou no 25 nun gran centro de Cuéllar rematado polo especialista nas cabezadas. Chris Ramos anotou o sexto gol da temporada. Antes do lecer estiveron moi preto do gol Cuéllar para o Lugo e Jairo para o Cartaxena. 

Na segunda parte baixou o nivel do partido. O Cartaxena empezou mellor e o Lugo respondeu cunha ocasión de Carbó e outra de Chris Ramos. O partido ía tranquilo ata que o VAR volveu intervir para rectificar unha decisión do colexiado e expulsou a Alberto Rodríguez. 

Con dez sobre o campo o Lugo tivo que preocuparse por gardar un punto que ao final resultou positivo. No engadido puido marcar o Cartaxena coas ocasións de Sadiku e Sangalli e os visitantes quedaron con dez pola expulsión de Alcalá.