Londres di que Irán non lanzou o dron que alcanzou a base militar en Chipre

Un dron tipo Shahed que na madrugada do luns alcanzou a base da Real Forza Aérea (RAF) británica Akrotiri en Chipre non foi lanzado desde Irán, confirmou este xoves o Goberno británico.

Un portavoz dixo que a investigación inicial das partes do aparello recuperadas indican "que se tratou dun dron tipo Shahed, que non foi lanzado desde Irán", e que impactou antes de que o primeiro ministro, Keir Starmer, autorizase o uso polos Estados Unidos das bases británicas con fins defensivos.

A fonte sinalou que o dron alcanzou un hangar do aeródromo, e non unha pista, como se afirmou previamente, e que causou "danos mínimos", sen provocar vítimas.

O ministro británico de Defensa, John Healey, atópase este xoves en Chipre, onde se reúne co seu homólogo chipriota e co persoal militar destinado ás dúas bases británicas na illa, a de Akrotiri, situada preto de Limassol, que foi parcialmente desaloxada tras ser atacada, e a de Dhekelia, próxima a Larnaca.

A visita prodúcese no medio de críticas ao Goberno laborista pola súa lenta resposta fronte ao impacto do pasado luns, ao que seguiron outros ataques con drons que foron interceptados, mentres que países europeos como Francia enviaron rapidamente efectivos para a defensa.

A líder conservadora británica, Kemi Bandenoch cuestionou a Starmer por non sumarse formalmente á ofensiva contra Irán iniciada o sábado polos Estados Unidos e Israel, ao considerar que estaría xustificado polo presunto ataque iraniano a Akrotiri, que finalmente se confirma que non procedeu de Teherán.

Starmer reiterou o mércores que Londres non se unirá formalmente á guerra dos Estados Unidos e Israel contra Irán iniciada o pasado sábado se non existe unha base legal e un plan viable, pero si autorizou o domingo o uso por parte dos EUA de bases británicas con fins defensivos.

Ademais de avións e helicópteros con capacidades antidrones, o Reino Unido prevé enviar a Chipre o destrutor HMS Dragon, que conta con defensas antiaéreas, pero non se espera que poida partir ata a próxima semana.