A solidez defensiva do Lugo non lle chega para puntuar en Leganés (1-0)
O gol de Cissé valeulle a un conxunto local que se mete en postos de promoción
Poucos achegamentos en ataque do equipo de Fran Justo
Ben en defensa, frouxo en ataque. Así se pode cualificar o partido do Lugo, que perdeu pola mínima en Butarque. Ao Leganés (11 xornadas sen perder) sáelle todo neste treito da temporada e métese nos postos de privilexio da Segunda.
Presentou unha aliñación con moito ferro no centro do campo Fran Justo, e o obxectivo de impedir a creación do Leganés cumpriuse á perfección. Apenas houbo ocasións nun primeiro tempo en que o Leganés tivo unha posesión do 70 % pero sen profundidade. Faltoulle ao equipo galego ameazar un pouco en ataque porque non se asomou sobre a porta de Riesgo. As mellores opcións do primeiro tempo, un remate de Nyom á saída dun córner e de Raba desde a frontal.
A segunda metade comezou cun aviso de Sebas Moyano. No minuto 56 o Leganés adiantouse no marcador cun tanto de Cissé aproveitando un rexeitamento dun disparo de José Arnaiz. Ao Lugo tocoulle interpretar outro papel moi distinto e custoulle moito levar a iniciativa. Whalley salvou unha ocasión de Raba para marcar o segundo e no taboleiro lucense case non apuntamos ocasións. A mellor estivo nas botas do central Álex Pérez no minuto 94, o primeiro tiro a porta do Lugo en todo o partido.
Desde a chegada de Fran Justo os marcadores móvense en diferenzas mínimas pero, desta volta, o resultado foi negativo para o cadro galego.
