Irán lanza unha nova ofensiva contra Israel con mísiles e drons
O ataque acadou Tel Aviv, Haifa e Beerxeba, con feridos e unha vítima mortal
Restos dun bombardeo iraniano en Haifa. REUTERS. Florion Goga
A Garda Revolucionaria de Irán lanzou este venres un ataque con mísiles e drons contra obxectivos militares e industriais en Israel. As zonas afectadas foron Tel Aviv, Haifa e Beerxeba, así como as bases aéreas de Nevatim e Hatzerim, segundo informou o exército iraniano.
Trátase da 17ª vaga de ataques contra Israel desde o comezo do conflito.
A Garda Revolucionaria afirmou nun comunicado que os bombardeos demostran “o crecente poder dos seus mísiles balísticos” e advertiu de que “o mundo debe esperar as nosas sorpresas”, en referencia a posibles futuros ataques.
Feridos e unha vítima mortal en Haifa
Israel confirmou impactos en Haifa e noutras zonas do centro e sur do país. Segundo o servizo de emerxencias Magen David Adom (MDA), un mozo de 16 anos resultou ferido grave, mentres que un home de 54 anos está en estado moderado. En total, os sanitarios evacuaron 23 persoas feridas tras o ataque a Haifa, a maioría con feridas leves por metralla.
Ademais, unha muller de 51 anos faleceu dun infarto mentres se atopaba nun refuxio antiaéreo en Carmiel, preto de Haifa.
O líder supremo iraniano, Ali Jameneí, celebrou a ofensiva cunha mensaxe en redes sociais: “O inimigo sionista está sendo castigado”. Acompañou o texto cunha fotografía dunha columna de fume en Haifa.
Horas antes, a Garda Revolucionaria reivindicara tamén un ataque contra o Canal 14 israelí, ao que cualificaron como “medio de propaganda sionista”. Segundo Irán, foi unha resposta ao bombardeo israelí contra a televisión estatal iraniana a semana pasada.
Israel iniciou a primeira ofensiva contra Irán na madrugada do 13 de xuño, argumentando unha ameaza nuclear por parte do país persa. Dende entón, as cifras de vítimas apenas se actualizaron oficialmente.
As autoridades iranianas manteñen o balance oficial en 224 mortos, pero organizacións como HRANA (opositora e con sede nos EUA) elevan a cifra ata os 639 falecidos. Segundo o Ministerio de Sanidade iraniano, entre os mortos hai 40 mulleres (dúas embarazadas) e 12 menores.
En Israel, o número de mortos mantense en 24, pero os hospitais xa atenderon 2.345 persoas feridas, na súa maioría con lesións leves.
