Investigan unha pelexa entre bandas como posible móbil da morte dun menor en Barcelona

Os Mossos d´Esquadra investigan a morte dun menor de 15 anos, que faleceu na noite deste xoves tras recibir varios disparos no parque da Pegaso, en Barcelona. As primeiras hipóteses apuntan a un enfrontamento entre bandas da zona como posible causa do crime. 

A conselleira Interior da Generalitat, Núria Parlon, cualificou os feitos como "a máxima expresión de violencia". Nunha mensaxe nas redes sociais, trasladou a súa condena polo sucedido e expresou o seu apoio á familia da vítima. 

Os feitos ocorreron arredor das 23:00 horas, cando varios veciños alertaron de que escoitaran disparos no parque. Os axentes localizaron pouco despois o menor ferido por arma de fogo na rúa Portugal, no distrito de Sant Andreu. Ata o lugar desprazáronse tamén sete unidades do Sistema de Emerxencias Médicas (SEM), que trataron de reanimalo sen éxito. 

Tras o tiroteo, os Mossos activaron un dispositivo para localizar os autores dos tiros. Algúns testemuños apuntan a que polo menos catro mozoa fuxiron do lugar. A invesigación permanece baixo segredo de actuacións.