Investigan por desvío de fondos o exprimeiro ministro Édouard Philippe, aliado de Macron
Investigan por desvío de fondos o exprimeiro ministro Édouard Philippe, aliado de Macron
Philipe está considerado como unha das personalidades políticas francesas máis populares e un dos potenciais candidatos para suceder en 2027 a Macron
![](https://img-g24-crtvg.flumotion.com/prog24/2024/20240403/Edouard_philippe.png)
A Fiscalía Nacional Financeira de Francia investiga o exprimero ministro francés Édouard Philippe por desvío de fondos públicos, favoritismo e acoso moral durante o seu actual posto como alcalde de Le Havre.
Philippe é un dos principais aliados do presidente Emmanuel Macron e potencial candidato ás presidenciais de 2027.
As dependencias do Concello desta localidade do norte de Francia, así como a sede da aglomeración urbana Le Havre Seine Metrópoles foron rexistradas este mércores.
Outros dous altos cargos municipais da confianza de Philippe tamén están a ser investigados.
Aínda que se fixo público este mércores, as autoridades francesas abriron a investigación en decembro de 2023, tras a denuncia dunha antiga directora xeral da aglomeración urbana de Le Havre, contratada ata abril de 2023, cando Philippe -responsable tamén da aglomeración de Le Havre Seine- decidiu non renovar o seu contrato.
A Policía Xudicial de Rouen -encargada da investigación- tratará de pescudar se se vulneraron as regras de contratación pública na concesión por parte da aglomeración dun contrato sobre o desenvolvemento de novas tecnoloxías por valor de 2,15 millóns de euros a unha asociación dirixida de maneira benéfica por unha das súas conselleiras tamén investigadas, Stéphanie de Bazelaire.
En declaracións á canle BFMTV, o que foi primeiro ministro de Macron aclarou que "demostrarán de boa fe que non se vulneraron as regras de contratación pública" e dixo poñerse ao dispor das autoridades para "responder a todas as preguntas".
Philippe, de 53 anos e antigo membro do partido centrodereitista dos Republicanos, está considerado como unha das personalidades políticas francesas máis populares e considéraselle como un dos potenciais candidatos para suceder en 2027 a Macron.
O exprimeiro ministro é o líder do movemento Horizons, un pequeno partido fundado en 2021 aliado da formación macronista Renacemento e dos centristas do Modem.