Investigan tres veciños de Vedra como presuntos autores dun delito de incendio forestal
Os tres investigados realizaron unha queima de restos tras un aproveitamento de madeira
Imaxe de arquivo
O Servizo de Protección da Natureza (SEPRONA) da Garda Civil da Coruña investiga dúas mulleres e un home como presuntos autores dun delito de incendio forestal por imprudencia grave.
Os feitos ocorreron tras ter coñecemento da existencia dun incendio no termo municipal de Vedra o 20 de marzo deste ano.
No transcurso da investigación, os gardas civís pescudaron que os tres investigados realizaban o aproveitamento da madeira de piñeiros e acacias dunha parcela, con autorización do dono.
Despois queimaron os restos non aproveitables e o lume permaneceu latente no interior da parcela durante varios días. En canto as condicións metereolóxicas foron propicias volveu reactivarse.
Debido a falta de medidas de seguridade, o lume estendeuse á vexetación próxima, non alcanzando maior extensión grazas á rápida intervención dos medios de extinción.
A Consellería do Medio Rural mantén suspendidas ata novo aviso as queimas de restos agrícolas e forestais realizadas por particulares por prevención.
