Investigan a aparición de ratas e cobras na farmacia do Hospital Montecelo
O xerente lembrou que o hospital está próximo ao campo e que o servizo de farmacia está na planta -2, o que favorece este tipo de situacións
A xerencia da área sanitaria de Pontevedra-O Salnés investiga a aparición de ratas e cobras na farmacia do Hospital Montecelo, en Pontevedra.
Así o ratificou o propio xerente. José Flores lembrou que o hospital está próximo ao campo e que o servizo de farmacia está situado na planta -2, o que favorece que poidan darse este tipo de situacións.
Con todo, matizou, iso non quita que haxa que poñer "inmediatamente" un dispositivo en marcha.
Tal e como comentou, xa se lle comunicou á Unidade de Prevención de Riscos Laborais e ao Servizo de Medicina Preventiva, entre outros, ademais de estar debidamente informado o equipo directivo.
"Estanse levando a cabo todas as medidas necesarias, cunha investigación para actuar en consecuencia e de forma definitiva sobre esta situación que, insisto, xa se dera noutras ocasións por unha cuestión de xeografía e situación", destacou.
