Interior inicia os trámites para rescindir un contrato de balas cunha empresa israelí
A Secretaría de Estado de Seguridade propón a liquidación do contrato en cero euros
A prohibición de importar material de defensa desde Israel fai inviable a súa execución
Imaxe dunha manifestación en maio de 2024 pedindo que e deixe de comrpar armas a Israel Diego Radamés / Europa Press
A secretaria de Estado de Seguridade, Aina Calvo, abriu o procedemento para rescindir o contrato coa empresa israelí IMI Systems LTD para a compra de munición destinada á Garda Civil, valorado en 6,6 millóns de euros.
Calvo asinou este luns o acordo que inicia a resolución do contrato por imposible cumprimento, despois de que a Xunta Interministerial Reguladora do Comercio Internacional de Material de Defensa e de Dobre Uso, dependente do Ministerio de Economía, denegase a autorización de importación. A decisión apóiase no real decreto aprobado o 23 de setembro, que recolle medidas urxentes contra o xenocidio en Gaza e de apoio á poboación palestina.
Un contrato de 2024 agora bloqueado
A adxudicación do contrato produciuse o 21 de outubro de 2024 en dous lotes: un de 4,46 millóns de euros e outro de 2,17 millóns. Para garantir o cumprimento, a empresa constituíra avais de 184.500 e 90.000 euros, equivalentes ao 5% do orzamento base de licitación de cada lote, sen impostos.
A pesar de que IMI Systems comunicara que tiña preparada unha partida de munición, o 4 de agosto de 2025 o subdirector xeral de Comercio Internacional de Material de Defensa e de Dobre Uso rexeitou a solicitude de importación, conforme ao informe vinculante da Xunta Interministerial.
O contrato tiña vixencia ata o 17 de xullo de 2027, mais a Secretaría de Estado considera que procede a súa resolución porque as obrigas da adxudicataria non se extinguiron. O acordo propón liquidar o contrato en cero euros, recoñecendo só unha posible indemnización á empresa por tratarse dunha causa allea ao contratista.
O procedemento outorga á compañía un prazo de 10 días para presentar alegacións antes de concluír a rescisión definitiva.
