Hidalgo nega que dese 500.000 euros a Ábalos e di que Aldama era o contacto con distintos ministerios

O exCEO de Air Europa Javier Hidalgo negou este martes no Tribunal Supremo que dese 500.000 euros ao exministro de Transportes José Luis Ábalos ou ao exasesor Koldo García polo "préstamo" concedido polo Goberno á aeroliña na pandemia.

Como testemuña no xuízo contra Ábalos, Koldo e o empresario, Hidalgo asegurou que Víctor de Aldama exerceu como "canle de comunicación" con diferentes ministerios nas xestións, á vez que admitiu que a decisión de contratalo foi súa e engadiu que formaba parte do equipo, "moi amplo", que participou na consecución do "préstamo".

"Participaba na parte institucional e o único que facía era ser unha canle de comunicación cos diferentes ministerios, non soamente co Ministerio de Transportes", precisou o ex conselleiro delegado.

Hidalgo subliñou que o préstamo, que devolveron con "millóns de intereses", tivo "moitísima importancia" porque ao comezo da crise sanitaria, Globalia (grupo matriz de Air Europa) "soamente recibiu 140 millóns de euros".

"E a pandemia estendeuse, cando moitos competidores, xa aos 20 días de iniciarse a pandemia, recibiran 1.000 millóns", contrapuxo, para engadir que para Globalia, con 18.000 empregados e cunha facturación de 5.000 millóns, "a sangría de caixa era moi importante".

"Condicións sibilinas" do préstamo, segundo Hidalgo

O exCEO de Air Europa criticou que o préstamo "foi todo imposto pola SEPI cunhas condicións realmente sibilinas".

"Eu descoñezo ningún préstamo que se dera en España onde se destitúa ao conselleiro delegado, neste caso a min", abundou.

"Ningún préstamo se deu con esas condicións. E ademais, estrangulando á compañía Globalia, tivemos que vender dous hoteis. E enriba, intervindo practicamente á compañía", insistiu.

Ademais, afirmou que non ten constancia de que se publicase unha nota de prensa por parte do Ministerio de Transportes sobre o préstamo e que "nunca se pediu" a mesma.

Javier Hidalgo declarou que "o único que pedía" Air Europa "era un documento oficial por parte da SEPI", que se datou o 9 de setembro, "en español e en inglés" para podelo "ensinar aos acredores, que a maioría eran estranxeiros".