Publicador de contidos

Publicador de contidos

Filipe VI coñece en Sarria o labor da Garda Civil na protección dos peregrinos

Filipe VI coñece en Sarria o labor da Garda Civil na protección dos peregrinos

Centos de veciños e alumnos dos colexios de Sarria esperaban o monarca á entrada do cuartel da Garda Civil

O acto tamén serviu para anunciar que a Federación de Camiños recoñecerá como oficial o selo da Garda Civil para as credenciais de Camiño

O rei Filipe VI esta mañá no cuartel de Sarria. EFE/ Lavandeira Jr.
G24.gal 26/04/2022 13:08

Filipe VI chegou arredor das once da mañá ao concello lugués de Sarria para coñecer as instalacións do cuartel da Garda Civil e as funcións da Benemérita para garantir a seguridade no Camiño de Santiago. Ademais, escolleuse Sarria porque é o inicio do Camiño máis próximo a Santiago, do Camiño Francés, desde o que xa se recibe unha compostela ao chegar a Santiago camiñando. De feito, o monarca vai recibir unha credencial selada con esta data.

É a primeira visita de Filipe VI á provincia de Lugo como rei. Centos de veciños e alumnos dos colexios de Sarria esperaban o monarca á entrada do cuartel da Garda Civil. Filipe VI foi recibido entre aplausos na que é a súa primeira visita oficial a este concello lugués. O xefe do Estado parou a saudar os sarriaos e especialmente os máis pequenos.

A Casa Real visita cada ano un cuartel da Garda Civil. Nesta ocasión elixiu un en Galicia coincidindo coa celebración do Xacobeo, e por tanto escolleu un no Camiño de Santiago, neste caso xusto no Camiño Francés.

O xefe do Estado chegou vestido co uniforme do Exército de Terra, que tamén estivo presente no acto. Á entrada del cuartel esperábao o ministro do Interior Fernando Grande-Marlaska acompañado pola directora da Garda Civil María Gámez e o vicepresidente da Xunta Alfonso Rueda.

O acto tamén serviu para anunciar que a Federación de Camiños recoñecerá como oficial o selo da Garda Civil para as credenciais de Camiño, a partir deste martes

Posteriormente, houbo unha recepción en que participaron as autoridades locais. Foi o vicepresidente primeiro da Xunta Alfonso Rueda o que finalmente acompañou o monarca nesta visita ao cuartel. O aínda  presidente autonómico Alberto Núñez Feijóo tiña varios actos que lle impediron acudir a Sarria.

Este é o primeiro acto do rei tras revelar o seu patrimonio onte, que ascende a 2,57 millóns de euros netos, entre depósitos bancarios, obras de arte, antigüidades e xoias. É a primeira vez que o rei dá a coñecer os seus ben e ten como obxectivo con iso cumprir o seu compromiso de renovar a monarquía para un tempo novo, con exemplaridade e transparencia. Esta medida non afecta a raíña Letizia.

Publicidade
Publicidade
Publicidade
Publicidade