Hamas comprométese a entregar todos os cadáveres dos reféns israelís que permanecen en Gaza

O xefe da delegación negociadora de Hamas, Khalil al-Hayya, afirma que o grupo islamista e as demais faccións palestinas están decididos a cumprir co acordo para pór fin á guerra en Gaza e para entregar a Israel todos os cadáveres de reféns na Franxa, aínda que destacou a dificultade de extraer os corpos.

"Hamas e as faccións palestinas están decididas a executar o acordo ata o final", dixo Al-Hayya nunha entrevista de televisión próxima á intelixencia exipcia, difundida este martes, e salientou: "O pacto perdurará porque queremos que perdure a nosa firme vontade de adherirnos a el".

Asegurou tamén que Hamas toma moi en serio a extracción e devolución de todos os cadáveres (de reféns israelís), tal como aparece recollido no acordo ratificado o pasado día 10 na cidade exipcia de Sharm el-Sheikh.

"Non temos ningunha ambición nin desexo de que ninguén quede sen que os seus corpos poidan ser devoltos ás súas familias e para que os dos nosos mártires tamén poidan ser devoltos ás súas familias", aseverou.

Destacou, con todo, a máxima dificultade na extracción dos cadáveres debido á presenza dalgúns baixo os entullos, o cal require moito tempo e equipo para extraelos e entregalos a Israel, segundo o acordo de Sharm el-Sheikh.

As súas declaracións chegan tras a inquietude polo futuro do acordo debido aos bombardeos israelís do domingo no sur de Gaza, que se produciron despois de que Israel acusase a formación palestina de violar o acordo.

A primeira fase, que entrou en vigor a finais da semana pasada, prevé un alto ao fogo en Gaza, o troco de reféns por prisioneiros e o ingreso de máis axuda ao enclave palestino.