Guardiola non logra o apoio de Vox, na primeira votación, para ser presidenta de Estremadura
O segundo pleno de investidura celebrarase este venres
Malia o rexeitamento de Vox, a formación de Abascal non descarta un acordo antes de 48 horas
A candidata popular di que o pacto entre as dúas formacións está moi preto, pero advirte que non asinará "cheques en branco"
María Guardiola na segunda xornada da sesión de investidura. EFE/Jero Morales.
A presidenta estremeña en funcións, a popular María Guardiola, non conseguiu este mércores ser investida para continuar ao fronte do goberno rexional. Todos os grupos parlamentarios da oposición, incluído Vox e tamén o PSOE e Unidas, rexeitaron a súa candidatura á presidencia da Xunta de Estremadura.
O voto do partido de Santiago Abascal era decisivo nesta sesión parlamentaria para que María Guardiola puidese ser investida. A candidata someterase a unha nova votación este mesmo venres, na que só necesitará maioría simple. Neste sentido, a popular non descartou que, se antes dese día non ten o apoio de Vox, tanto ese partido como o PSOE se absteñan co obxecto de "poder gobernar".
Vox non pecha a porta a un acordo e Guardiola di que está máis preto que nunca
"Hoxe non conta coa confianza do meu grupo parlamentario", dixo o portavoz de Vox, Óscar Fernández Cale, sen descartar un posible acordo nas próximas 48 horas.
Pola súa banda, María Guardiola, tras rematar a sesión plenaria, afirmou que o pacto con Vox está máis preto que nunca, aínda que subliñou a necesidade de que este inclúa un proxecto orzamentario para este ano. Engadiu que se reunirá "as veces que fagan falta", pero "cheques en branco, non".
Durante o pleno deste mércores, a candidata do Partido Popular remarcou que para conformar un executivo e un programa de goberno se debe ter en conta o resultado das eleccións do pasado 21 de decembro. Tras lembrar que o PP logrou o 43,11 % dos votos nos comicios (Vox obtivo o 16,90 %) Guardiola instou ao partido que lidera Abascal a alcanzar un "acordo xusto cos resultados".
O voceiro de Vox, Óscar Fernández Cale, na súa intervención dixo "será un si ou un non, porque aquí non hai medias tintas. Se hai acordo, será un si, e se non o hai, será un non, e agora mesmo, como vostede sabe, non hai ningún acordo".
Con todo, Fernández Cale asegurou que seguen dispostos a chegar a ese acordo sobre a base dunhas propostas que o PP ten no seu poder, segundo manifestou, desde xaneiro. Para Vox, o primeiro son os proxectos para "cambiar" Estremadura tras 40 anos de "ruína e mafia socialista", despois falaríase de "o menos importante", "onde senta cada un". Engadiu o voceiro desta formación que "se hoxe non se chegou a un acordo, é porque en Génova aínda non queren".
No seu discurso, Fernández reiterou as medidas que Vox considera imprescindibles para un posible acordo: a defensa da continuidade da central de Almaraz, a protección do sector primario fronte "as imposicións" do Pacto Verde Europeo e "unha profunda" rebaixa fiscal.
Tamén esixen medidas de apoio á natalidade e ás familias, prioridade para os españois en axudas sociais e vivenda, e a eliminación de subvencións a entidades ideolóxicas e ONG vinculadas "á promoción da inmigración ilegal".
Dous meses máis
No caso de que María Guardiola non resultase elixida este venres, 6 demarzo, hai un prazo de dous meses desde a primeira votación, ata o 4 de maio, para tentalo coa mesma candidata ou con outros deputados. Se finalmente non houbese acordo, a Asemblea quedaría disolta e convocaríanse de novo eleccións.
