O Celta está a protagonizar unha tempada 2025-26 marcada pola súa consolidación competitiva e polo salto definitivo a nivel europeo. En Liga, o conxunto vigués mantense na zona alta da clasificación, arredor do sexto posto, cun rendemento sostido e unha media próxima aos 1,6 puntos por partido, confirmando a súa evolución respecto a campañas anteriores.
A pesar de certa irregularidade en momentos puntuais, o equipo amosou capacidade para competir contra rivais de maior entidade e manterse na loita polas posicións europeas.
En Europa, o Celta asinou unha das súas mellores campañas recentes. Tras superar a fase de grupos e eliminar ao PAOK, o cadro celeste conseguiu un fito histórico ao deixar fóra o Olympique de Lión e meterse nos cuartos de final da Europa League, algo que non lograba desde hai case unha década. Cun balance de máis de 20 goles a favor na competición e unha proposta valente, o equipo destacou pola súa intensidade, presión alta e capacidade para competir en escenarios esixentes.
Boa parte deste crecemento leva o selo de Claudio Giráldez, convertido nun dos grandes nomes da tempada. O técnico apostou decididamente pola canteira, dando protagonismo a numerosos xogadores formados na Madroa, e construíu un equipo recoñecible, dinámico e competitivo. O seu estilo, baseado na intensidade e no equilibrio entre xuventude e experiencia, permitiu non só estabilizar o Celta en Liga, senón tamén devolvelo ao protagonismo europeo. Claudio, nunha entrevista á Radio Galega, asegurou que vive o momento.
"Temos a perspectiva do bonito do momento que vivimos, hai moita ilusión"
O técnico celeste non falou da súa posible renovación.
"Estou onde quero estar, feliz, e, cando chegue o momento, falaremos co club. Teño contrato en vigor, e só penso en que chega o momento máis bonito da temporada e non é momento de estar nos despachos"
Así, o curso celeste está a consolidarse como un punto de inflexión, cun equipo que medra en identidade e ambición baixo a dirección dun Giráldez que xa simboliza o novo rumbo do club.
