Feijóo cre que, tras as eleccións en Estremadura, "activouse un efecto dominó que non vai parar"

Na sede do PP na rúa Génova, en Madrid, María Guardiola recibiu este luns o aplauso dos seus compañeiros de filas. A dirección nacional cre que a súa vitoria marca o camiño cara á Moncloa, que este é o primeiro paso para facerse co goberno de España.

"Activouse un efecto dominó que non vai parar", dixo Alberto Núñez Feijóo ante a executiva do seu partido. Na súa opinión, "o declive irreversible do PSOE non fixo máis que empezar" porque "os españois non queren máis sanchismo" e advírtelles aos socios que apoian a coalición que "caerán con Sánchez".

Menos entusiasmo había este luns na sede do PSOE. A súa voceira, Montse Mínguez, admitiu ante os xornalistas que o de Estremadura "foi un mal resultado para o PSOE" pero, aínda así, considera que "queda Pedro Sánchez para moito rato".

Pedro Sánchez non analizou en público os resultados en Estremadura, e iso que a primeira hora compareceu para anunciar que Milagros Tolón, ata agora delegada do Goberno en Castela-A Mancha, xa é a nova ministra de Educación, FP e Deportes. E Elma Saiz, a titular de Seguridade Social, agora, ademais, nova voceira do executivo.

Na súa comparecencia, o presidente falou dunha nova etapa na que entra "con enerxía renovada e as pilas cargadas".

Este mesmo luns fíxose público o acordo con EH Bildu para prorrogar o chamado escudo social. En conferencia de prensa, o seu deputado no Congreso, Oskar Matute, apuntou que "os resultados de Estremadura son preocupantes pero non por iso menos esperables".

Máis ácida é a análise que fai o sector crítico do PSOE, con Emiliano García-Page á cabeza. O presidente de Castela-A Mancha cre que ao seu partido lle "sobra autoengano e fáltalle autocrítica".

O mesmo pensa Podemos, que si celebra os resultados de Unidas por Estremadura. Cren que rompe a súa tendencia á baixa. "É unha moi boa fórmula, é o camiño que hai que seguir" nos próximos comicios autonómicos, como os de Aragón. É unha fórmula que inclúe a Izquierda Unida, pero que exclúe a Sumar da candidatura.