Extinguido o incendio forestal en Ribas de Sil tras queimar 190 hectáreas

A Consellería do Medio Rural informou este xoves de que o incendio forestal rexistrado no municipio lucense de Ribas de Sil, na Ribeira Sacra, quedou extinguido o mércores pola noite, despois de arrasar desde o sábado 11 de xullo unhas 190 hectáreas de superficie.

O incendio, que comezara o pasado sábado ás 18:22 horas na parroquia de Soutordei, quedou extinguido ás 23.04 horas do mércores, despois de queimar 133 hectáreas de monte raso e 57 de monte arborado.

Este incendio obrigou a decretar temporalmente a Situación 2 de alerta, como medida preventiva, pola proximidade ao núcleo de Chenzas, aínda que quedou desactivada xa na madrugada do domingo.

Tamén obrigou a interromper temporalmente a circulación de trens pola zona afectada e a cortar ao tráfico dunha estrada provincial.

Para a súa extinción, a Consellería do Medio Rural mobilizou numerosos medios terrestres: 8 técnicos, 45, axentes, 65 brigadas, 47 motobombas e 4 escavadoras.

Nesta zona, cunha orografía complicada, tamén foi importante o traballo dos medios aéreos, 9 helicópteros e 8 avións.