España pide que a morte da cooperante en Ucraína sexa investigada como crime de guerra
O ministro de Exteriores en funcións pídellelo á Corte Penal Internacional e á Fiscalía de Ucraína
Enma Igual faleceu o domingo 10 de setembro polo impacto dun proxectil ruso
España pediu este martes á Corte Penal Internacional e á Fiscalía ucraína que investiguen a morte da cooperante Emma Igual, que faleceu o pasado domingo, día 10, polo impacto dun proxectil ruso en Ucraína, como "un crime de guerra".
O anuncio fíxoo este martes en Estrasburgo o ministro de Asuntos Exteriores en funcións, José Manuel Albares, en declaracións a medios españois. Albares precisou que este martes asinou dúas cartas: unha dirixida á Corte Penal Internacional, con sede na Haia, e outra ao ministro de Exteriores de Ucraína, Dimitri Kuleba, para que investiguen as fiscalías respectivas a morte de Igual como crime de guerra.
Condecoración a título póstumo
Tamén este martes o Goberno español recoñeceu o traballo humanitario da cooperante Emma Igual, e concedeulle a título póstumo a Gran Cruz de Isabel a Católica. Esa distinción adoptada este martes oficialmente, que é a de maior importancia que Exteriores outorga, xa fora anunciada a véspera polo xefe da diplomacia europea en funcións.
O labor de Igual sobre o terreo en Ucraína foi ocuparse da evacuación da cidadanía en zonas de maior risco, segundo destacou o Goberno.
