Comesaña: "Os casos de ingreso directo en UCI son de mozos non vacinados"

A situación nos hospitais galegos empeora. Por terceiro día consecutivo aumentan os ingresos. Hoxe hai 26 pacientes máis hospitalizados, que elevan a cifra a 140. Preocupan os casos de ingreso directo nas UCI de persoas non vacinadas. 

"Hai que seguir insistindo na vacinación, aquelas persoas que aínda non se vacinaron, son poucas en Galicia, pero aínda quedan", así o manifestou o Conselleiro de Sanidade. Julio García Comesaña advirte: "Hai casos de ingreso directo en UCI de non vacinados e persoas novas. Ademais, hai que seguir animando á vacinación, que é unha das principais ferramentas".

Sanidade di que aínda é cedo para saber cando se chegará ao pico desta nova vaga. Para conter os contaxios, traballan con varias posibilidades. Unha delas, ampliar o uso do pasaporte covid a máis sectores.

"Sempre dixemos que se había que tomalas se tomarían. De momento, estamos a esperar os resultados da evolución destes días e tamén do impacto das medidas que puxemos en marcha", engadiu o titular de Sanidade.

A única lectura positiva dos datos está no ritmo de crecemento dos novos casos. Estabilízase. Está por debaixo do 5 %.