Cerdán publica un libro sobre o "xuízo político" tras a súa implicación no caso Koldo

O exsecretario de Organización do PSOE Santos Cerdán publicou un libro no que reflexiona sobre o "poder do relato" e as consecuencias do "xuízo político" tras a súa implicación no caso Koldo e tamén na presunta trama do caso Leire Díez.

O libro leva por título La caída. Poder, relato y destrución en la era del juicio político e estará dispoñible na plataforma Amazon a partir do 30 de xuño.

Trátase dun libro en que narra en primeira persoa a súa experiencia e reflexiona sobre as consecuencias persoais, políticas e institucionais do que considera un "xuízo mediático", segundo sinalou a contorna do exdirixente socialista.

Cerdán foi detido e estivo máis de catro meses en prisión provisional polo seu "papel principal" na presunta trama de adxudicación de obra pública a cambio de comisións que se investiga no caso Koldo. Tamén está imputado noutra causa, a da exmilitante do PSOE Leire Díez, que indaga nunha presunta trama para obstruír casos xudiciais.

No seu libro, Cerdán ofrece a súa versión dos feitos e analiza "como a construción do relato público pode condicionar a percepción social antes mesmo de que exista unha resolución xudicial".

Neste sentido, reivindica a importancia da presunción de inocencia como principio esencial de calquera Estado democrático e expón unha reflexión sobre a relación entre política, medios de comunicación e opinión pública.

O exdirixente e exdeputado do PSOE invita o lector a reflexionar sobre o "equilibrio" entre o dereito á información, a rendición de contas dos responsables públicos e o respecto ás garantías xurídicas que sustentan o Estado de dereito.