Feijóo promete un goberno limpo e sinala a Bildu como única liña vermella: "Só hai dúas opcións, ou Sánchez ou eu"

O presidente do PP Alberto Núñez Feijóo asegurou este domingo que cando chegue ao Goberno devolverá a normalidade á vida política e a súa primeira tarefa será conseguir que os anos de Pedro Sánchez se convertan nunha paréntese da historia: "Imos demostrar que España ten solución".

"Non foi normal nin a forma de gobernar nin o funcionamento das institucións nin a forma de lexislar", dixo Feijóo, quen denunciou que co Goberno de Pedro Sánchez o irregular se converteu en norma, pero insistiu en que o PP poñerá solución a esta situación. Asegurou: "Só hai dúas opcións: ou Sánchez ou eu".

O líder popular asegurou que non impoñerá se goberna ningún cordón sanitario a Vox nin ao PSOE, só a Bildu.

Núñez Feijóo asegurou que se abre un tempo novo: "Un tempo de cambio que non chegará só por desgaste, senón pola nosa capacidade para dar esperanza".

Ademais, o líder popular acusou a Pedro Sánchez de tentar quebrar deliberadamente a convivencia entre os españois. Dixo que busca aproveitarse do enfrontamento e torar o Estado.

Responsabilizou o presidente do Goberno de abandonar a centralidade e someter o seu partido, o país e as minorías e esquecer que España é unha nación diversa. Acusouno de retorcer a Constitución, de violentar no seu propio proveito o principio de legalidade, de partir o Estado, as fronteiras, a caixa común, a acción exterior e a política migratoria e de colonizar as institucións para expandir o seu poder persoal.

Pola contra, o presidente do PP comprometeuse a encabezar un goberno limpo e de todos se chega á Moncloa. "Acabouse o muro entre españois", dixo.

Feijóo comprometeuse a convocar eleccións cando estea á fronte do Executivo se non logra sacar adiante os Orzamentos Xerais do Estado ou se perde o apoio parlamentario necesario para gobernar.

"Se presento orzamentos e non mos aproban, convocarei eleccións", aseverou ante o plenario, para engadir que se a maioría non o sostén, como lle sucede agora ao presidente do Goberno Pedro Sánchez, tamén adiantará os comicios.

O presidente do PP detallou algunhas das primeiras medidas que poría en marcha o seu partido cando chegue ao goberno. Entre elas, medidas de rexeneración democrática, levar o plan da vivenda ao primeiro Consello de Ministros ou traballar polas subas salariais. Tamén un Plan estatal de augas e medidas orientadas a reducir a inmigración ilegal ou reforzar a seguridade.

Prometeu ademais revisar as 97 subas fiscais de Sánchez, incrementar o número de médicos de familia e tamén loitar para que a clase media volva ser o motor do país.

Ayuso a Feijóo: "Teu é o partido, imos estar en todo momento ao teu lado"

Na intervención inicial desta xornada, a presidenta da Comunidade de Madrid Isabel Díaz Ayuso garantiu ao líder do PP Alberto Núñez Feijóo o seu apoio e o de todo o partido para devolver España a todos os españois. A presidenta madrileña pediulle ao presidente Sánchez que marche.

A dirixente madrileña do PP referiuse ao presidente dos populares como un madrileño de Galicia que ten o apoio absoluto do partido, que foi referendado no conclave con máis do 99 % dos apoios.

Ayuso asegurou: "En Madrid fuximos dos nacionalismos. Madrid é o antídoto do comunismo, é liberdade".

Díaz Ayuso cargou contra Pedro Sánchez, acusándoo de manterse no poder grazas a un pacto corrupto.

Entre os convidados a este congreso están o secretario xeral de UGT Pepe Álvarez, o presidente da CEOE Antonio Garamendi e o máximo responsable do colectivo de autónomos ATA Lorenzo Amor.