As protestas contra os recortes na lei trans saen á rúa en 17 cidades

Máis de sesenta colectivos apoiaron as manifestacións contra os recortes da lei trans. A participación foi máis significativa en Madrid e Barcelona, entre as 17 cidades nas que houbo marchas de protesta. Todas estiveron encabezadas polo mesmo lema "Dereitos humanos sen recortes para todes".

A polémica de fondo, que está na raíz desta mobilización, radica sobre todo nunha decisión do PSOE. É a de manter unha emenda que prevé que sexan os xuíces os que deban autorizar o cambio de sexo rexistral para os menores de 16 anos .

"Eu diríalle ao partido no que militei 45 anos que retire esas vergoñentas emendas que cercean aínda máis os nosos dereitos", declarou a exdeputada do PSOE Carla Antonelli.

"Temos que asegurar que un colectivo que viviu nas marxes e na clandestinidade vexa cumpridos os seus dereitos e as súas promesas", sinalou Mónica García, covoceira de Más Madrid.

Varios colectivos participantes falan de presentar un recurso ante o Tribunal Constitucional se se manteñen os recortes no texto lexislativo:

"O Tribunal Constitucional deixou superclaro que os menores teñen dereito á rectificación do seu nome e sexo no DNI sempre que demostren madurez e estabilidade", explicou a presidenta da Asociación de Transexuais, Mar Cambrollé.

Nas manifestacións lembrábase que a lei trans vai pasar o luns vindeiro o seu primeiro exame ante a Comisión de Igualdade do Congreso e que chega sen acordo entre o PSOE e Unidas Podemos.