As novas tendencias estéticas na imaxe masculina dan pulo ás barberías
Proliferan os locais con decoración máis moderna, que funcionan como clubes sociais, con estilos e servizos para todos os públicos
O 40 por cento dos negocios activos agora en Galicia abriu nos últimos cinco anos
Para os homes, ir cortar o pelo xa non é o que era. Agora as barberías de toda a vida están dando paso a negocios con decoración chamativa, con novas ferramentas para facer cortes e peiteados máis creativos.
Mentres aínda se manteñen algúns profesionais que seguen o estilo tradicional, proliferan porén as barberías con estética atrevida, que ofrecen servizos a medida e que funcionan case como locais sociais.
En resposta a ese crecente interese polo coidado da imaxe entre a poboación masculina, especialmente a máis moza, xurdiu unha morea de negocios que transformaron o concepto do clásico salón de peiteado e afeitado.
O sector experimenta unha progresión constante dende a pandemia. Dos negocios activos en Galicia, o 40 por cento abriu nos últimos cinco anos.
