As comunidades autónomas non obrigarán a usar máscara en interiores

A maioría de comunidades autónomas non cre necesario recuperar a obrigatoriedade do uso de máscaras en interiores a pesar do incremento de contaxios e de hospitalizacións por covid-19. 

Porén, tanto as autonomías coma o Goberno central apelan ao "sentido común" e a que cada un decida como protexerse.

Segundo o último informe do Servizo de Vixilancia de Infección respiratoria Aguda (SIVIRA) do Instituto de Saúde Carlos III deste xoves, a circulación da covid-19 intensificouse e tamén aumentaron as taxas de hospitalización, especialmente en maiores de 79 anos.

Son os datos correspondentes á semana do 27 de xuño e o 3 de xullo, que lanzan unha taxa de hospitalización de 11,2 casos por cada 100.000 habitantes, respecto a os 9,6 na semana previa. No caso dos maiores de 80 anos, a cifra é de 96,2 casos, fronte aos 89,3 da semana anterior.

Este xoves, a ministra de Sanidade, Carolina Darias, asociou o aumento dos contaxios por COVID-19 á expansión das variantes ómicron BA.4 e BA.5, que teñen maior transmisibilidade, aínda que todo apunta a que non teñen máis gravidade.

A responsable de Sanidade lembrou que se manteñen as medidas en vigor para evitar contaxios, como o uso obrigatorio da máscara en hospitais e centros sociosanitarios, en transportes públicos e en farmacias.

Ademais, volveu apelar "á cultura do coidado e o uso responsable das máscaras", especialmente as persoas vulnerables.

Ante o aumento dos contaxios, a Xunta de Andalucía mostrouse partidaria de recomendar o uso de máscaras en determinadas situacións en que poida haber aglomeracións ou en espazos, públicos de interior, segundo sinalou o conselleiro de Saúde e Familias Jesús Aguirre.

Namentres, o presidente en funcións Juanma Moreno declarábase "por agora" contrario a impoñer o uso da máscara "en ningún espazo" máis aló dos xa determinados e defendía que a poña "todo aquel que queira".

Tamén descartou a adopción de medidas excepcionais a conselleira de Sanidade do Goberno de Aragón Sira Repolles, aínda que advertiu da necesidade de extremar as precaucións respecto do uso de máscaras en interiores, da protección ás persoas vulnerables e de que os positivos se illen para evitar contaxios.

Non prevé tampouco adoptar novas medidas restritivas Castela-A Mancha nin vai apostar por recuperar a obrigatoriedade do uso das máscaras en interiores, xa que, segundo o seu presidente Emiliano García-Page non é unha medida que recomenden os expertos.

O Goberno canario, que insistiu na necesidade de poñer as doses de reforzo, descartou restricións nas actividades ou movementos, pero recomendou o uso de máscaras en lugares pouco ventilados e onde haxa aglomeracións.

Pola súa banda, o presidente galego Alfonso Rueda cre que a situación actual non obriga a tomar medidas adicionais contra a covid-19, pero dixo que o feito de que non sexa obrigatorio o uso de máscaras en interiores "non quere dicir que quen queira non poida usala como medida de prevención".

En Valencia, a patronal de residencias pediu unha reunión á Consellería de Sanidade para revisar o protocolo vixente con varias medidas, entre as que figura a volta das máscaras para os residentes.

Así mesmo, o Colexio de Farmacéuticos de Valencia fixo fincapé na necesidade de cambiar a mentalidade e volver utilizar a máscara en interiores e naquelas situacións en que non poida garantirse a distancia de seguridade de 1,5 metros e mais no caso de ter un contacto estreito e de estar con persoas vulnerables.