Anulan o anel do Pescador de Francisco 16 días despois da súa morte

O anel do Pescador e os selos do papa Francisco, símbolo do poder pontificio, foron anulados dezaseis días despois da súa morte, confirmou o portavoz da Santa Sé, Matteo Bruni, un día antes do conclave para elixir un novo pontífice.

O anel foi anulado marcando unha cruz sobre a súa superficie por unha muller cuxa identidade non transcendeu, durante unha das reunións ou congregacións de cardeais na aula do Sínodo da Cidade do Vaticano.

A experta anulou o anel e os selos do pontificado de Bergoglio cun punzón para metais, ante a presenza do cardeal camarlengo, Joseph Kevin Farrell, encargado de administrar este período de sede vacante.

Os propios cardeais que participan nas congregacións previas ao conclave foron quen decidiron os prazos para a destrución do anel do Pescador e dos selos oficiais cos que Francisco marcaba as súas cartas e documentos.

En tempo de sede vacante, a constitución apostólica Universi Dominici Gregis asigna á congregación cardinalicia o deber de "coidar que sexan anulados o anel do Pescador e o selo de chumbo, cos cales son enviadas as cartas apostólicas".

O anel debe ser retirado do dedo do pontífice tras constatar a súa defunción polo camarlengo, nesta ocasión o estadounidense Joseph Kevin Farrell, o que marca o final do seu 'reinado'.

A anulación do anel e do selo lévase a cabo para evitar calquera falsificación ou manipulación de documentos papais.

Co mesmo obxectivo, tras o falecemento do papa arxentino, o 21 de abril con 88 anos, o camarlengo e outras autoridades vaticanas clausuraron o seu apartamento na Casa Santa Marta, onde residiu durante o seu pontificado, e tamén o do Palacio Apostólico.

Os apartamentos serán reabertos polo seu sucesor, que deberá ser elixido a partir deste mércores no conclave polos cardeais, encerrados na Capela Sixtina.

Este anel, xunto ao palio, ambos símbolos do poder pontificio, será entregado ao novo papa tras a súa elección, na misa de inicio de pontificado.