Alemaña detén un ex-xefe dos servizos secretos acusado de espionaxe

Un antigo xefe do Servizo de Información Federal (BND) alemán, August Hanning, foi detido este martes acusado dun delito de alta traizón. Sospeitan que, cando xa deixara o cargo, actuou ao servizo dunha axencia de espionaxe estranxeira, segundo informou a Fiscalía Xeral xermana.

Hanning, que deixou de presidir o BND en 2005, foi detido no distrito de Steinfurt (oeste) por axentes da Oficina de Investigacións Criminais (LKA). Houbo tamén rexistros en inmobles de Berlín relacionados co acusado.

Ademais, os axentes arrestaron no distrito de Bad Tölz-Wolfratshausen (sur) un presunto cómplice, identificado tan só como Manfred D., que foi xefe de gabinete de Hanning cando este presidía o BND, entre 1998 e 2005, e máis tarde o seu asistente cando foi secretario de Estado no Ministerio do Interior entre 2005 e 2009.

Manfred D. volveu traballar para varios presidentes do BND e presuntamente aproveitou a súa función de xefe de gabinete, que lle daba acceso a numerosas informacións confidenciais, para fornecer a cambio de remuneración a Hanning, que para entón exercía de asesor de seguridade privado.

Segundo sinalou a Fiscalía, ata 2022 Manfred D. proporcionou a Hanning preto de 2.000 documentos, entre eles moitas informacións clasificadas como confidenciais e que estaban destinados exclusivamente ao uso interno do BND.

Hanning comparecerá entre este martes e o mércores ante o xuíz de instrución do Tribunal Federal de Xustiza, que decidirá sobre o seu ingreso en prisión.

Finalmente, a Fiscalía explicou que as sospeitas contra o ex xefe do BND xurdiron como parte do mediático proceso contra a empresaria Christina Block, coñecida pola cadea de restaurantes Block House e que está acusada de intentar secuestrar a dous dos seus fillos, aos que o seu exmarido levara a Dinamarca irregularmente durante unha disputa pola custodia.

Non se trata do primeiro caso de presunta espionaxe que sacode ao BND, pois un alto cargo identificado como Carsten L. xa foi detido en 2022 pola sospeita de que era un axente dobre ruso, aínda que non se espera que o xuízo conclúa ata o ano que vén.