Ábalos pídelle ao Congreso que reconsidere a súa expulsión como deputado

O exministro e exsecretario de Organización socialista José Luis Ábalos, en prisión provisional no cárcere de Soto del Real, solicitou á Mesa do Congreso dos Deputados que "reconsidere" a súa decisión, adoptada o pasado 10 de decembro, de suspender os seus dereitos e deberes parlamentarios.

Ábalos afirma que se trata dunha decisión "precipitada, indebida e arriscada" en tanto que non se resolva o recurso de apelación que presentou ante o Tribunal Supremo o pasado 4 de decembro contra o auto de prisión do 27 de novembro.

Así o sinalou a través da súa conta de X, onde publica o escrito dirixido ao órgano de goberno da Cámara Baixa, datado o 31 de decembro e no que pide ser restituído "polo menos" ata que se celebre a vista do día 15 de xaneiro, data fixada pola sala segunda do Supremo para estudar o seu recurso.

A suspensión, sinala Ábalos, "vulnera principios democráticos e do Estado de Dereito como o respecto aos procedementos, a separación de poderes e a igualdade de trato" e "dana a confianza institucional e a imparcialidade necesaria para a democracia parlamentaria e representativa".

A Mesa do Congreso aprobou a súa suspensión o pasado 10 de decembro despois de que o Tribunal Supremo confirmase o seu procesamento por delitos como organización criminal, suborno ou malversación.

A decisión, en aplicación do artigo 21.2 do Regulamento do Congreso, implica a perda do dereito ao voto, da remuneración económica e baixa na cobertura de protección social, entre outros aspectos.