Ábalos e Koldo volven ao Supremo tras os últimos indicios de mordidas por obras púbicas

O exministro de Transportes José Luis Ábalos e quen fora o seu máis estreito asesor, Koldo García, regresan este luns ao Tribunal Supremo tras os últimos informes achegados pola Garda Civil, que os implican en presuntas adxudicacións irregulares de obra pública e nunha suposta repartición de mordidas.

A deste luns será a segunda vez que comparezan ante o xuíz Leopoldo Puente. Ambos fixérono xa hai meses, cando a causa se cinguía esencialmente ao posible cobro de comisións en relación a contratos de máscaras na pandemia.

Os últimos achados da Unidade Central Operativa (UCO) da Garda Civil fixo que a causa escale ao posible amaño de contratos de obra pública e o presunto cobro de contraprestacións económicas que tamén salpicou o ex número tres do PSOE Santos Cerdán, citado como investigado o 30 de xuño.

O 20 de xuño, axentes da UCO acudiron á sede socialista, na rúa Ferraz, e ao Ministerio de Transportes para clonar os correos corporativos de Santos Cerdán e Ábalos. Tamén accederon ás instalacións de Adif e da Dirección Xeral de Estradas.

A UCO apunta a pagos de 620.000 euros

Os investigadores consideran que Ábalos e Koldo actuaron en favor das construtoras Acciona, LIC e OPR para "a obtención, presuntamente fraudulenta, de contratos de obra pública", e que iso lles xerou unha contraprestación económica.

A Garda Civil apunta no seu informe que Ábalos e Koldo percibirían, presuntamente, de Acciona 620.000 euros, que serían xestionados por Santos Cerdán. Segundo Koldo, quedarían 450.000 euros pendentes de cobranza.

Nunha entrevista coa Cadea Ser o xoves, Ábalos dixo que era o "imbécil de todo isto" porque Cerdán e Koldo "penetraron no Ministerio", onde o "presionaron para tratar de influír" nas contratacións, e negou recoñecerse nos audios das conversas gravadas polo seu exasesor. Asegurou que declararía ante o xuíz.

Os supostos contratos amañados conectan con Adif e a Dirección Xeral de Estradas. O xuíz viu indicios de que os seus entón responsables, Isabel Pardo de Vea e Javier Herrero, seguindo "directrices" que "impartía "Ábalos a través do seu asesor, contribuíron para que as adxudicacións "puidesen chegar a bo termo".

Pardo de Vera xa está investigada na Audiencia Nacional pola contratación dunha exparella de Ábalos, Jéssica Rodríguez, nas empresas públicas Ineco e Tragsatec. Este martes testifican catro responsables da primeira mercantil e de ADIF de entón.

Posible valoración de medidas

O xuíz do Supremo ve na causa indicios de delitos de organización criminal e suborno, que xa pesaban contra Ábalos e Koldo, xunto ao de tráfico de influencias, e polo que xa están baixo medidas cautelares. De momento non poden saír do país e deben comparecer perante o xulgado cada quince días; tras a súa comparecencia desde luns, o xuíz podería valorar agravar estas medidas, se llo piden.

Segundo fontes xurídicas, as acusacións populares que coordina o PP estudan se solicitan endurecelas, sen descartar a prisión.

O propio xuíz advertiu a Koldo García, ante os seus intentos de aprazar a súa declaración, de que se non comparece, poderá adoptar as medidas cautelares que procedan. O exasesor, que nun principio se inclinaba por non declarar, solicitou ata tres veces cambiar a súa citación e cambiou de avogado ás portas da súa comparecencia.

As gravacións de Koldo

O informe da UCO "nútrese" de conversas gravadas por Koldo entre 2019 e 2023, que discorren sobre "a persecución do pago de presuntas contraprestacións económicas debidas tras a adxudicación de obra pública".

Por exemplo, nunha conversa mantida entre Cerdán, Ábalos e Koldo, en xaneiro de 2021, cando este último realizaba un "repaso detallado dos pagos efectuados ata a data", o primeiro díxolle: "Koldo! Que non quero que fales disto, que non se fala".

Noutra, de novembro de 2023, Ábalos dicíalle a Koldo que non tiña "un puto duro" e ía "con cincuenta euros toda a puta semana", ante a sorpresa do seu interlocutor -"non gastas 470.000 euros en dous anos... non me fodas"-. Ambos falan de diñeiro e Koldo dille que ao exministro debíanlle 450.000 euros e a el outros 100.000 ou 105.000.

O PSOE mostrou a súa repulsa polos termos nos que Ábalos e Koldo falaban de mulleres noutras conversacións.

No rexistro á casa do exministro en Valencia, a UCO interveu 34 dispositivos, incluído un disco duro que unha muller que acompañaba a Ábalos tratou de levar oculto no pantalón, coa escusa de sacar a pasear o can, de acordo coa acta policial. Segundo Ábalos, gardaba a súa estratexia de defensa e conversas con Pedro Sánchez, ministros e directores de medios desde 2021. EFE