A Xunta reivindica que as súas medidas contra a pobreza infantil sitúan Galicia coa menor taxa

A conselleira de Política Social e Igualdade, Fabiola García, reivindicou a situación de Galicia respecto á pobreza infantil, "consolidándose como unha das comunidades con menores índices de desigualdade".

Apuntou que, segundo os datos do Instituto Nacional de Estatística (INE), Galicia é a comunidade que máis reduciu en 2024 a taxa Arope, que mide o risco de pobreza e exclusión social. Agora, a taxa sitúase no 18,8 %, a máis baixa desde que se teñen datos e sete puntos por baixo da media nacional.

A conselleira demandou ao Goberno central un "compromiso real" que permita garantir a sustentabilidade dos servizos sociais que dependen das comunidades autónomas e un financiamento acorde "coas necesidades reais".

Tamén reivindicou as actuacións do Goberno galego para a erradicación da pobreza infantil. Concretamente, medidas centradas na infancia, na educación e no apoio ás familias.

"Investir en infancia é investir en futuro", asegurou.

A conselleira incidiu na aposta de Galicia pola gratuidade das escolas infantís. Afirmou que é a comunidade que ofrece a gratuidade con máis amplitude, ao estar implantada en máis de 550 escolas infantís, con máis de 32.000 prazas gratuítas, durante oito horas ao día e 11 meses ao ano.

Esta medida permite que Galicia conte cunha taxa de escolarización nesta etapa do 60,6 %, 13 puntos por encima da media estatal e sexa líder en escolarización por segundo ano consecutivo.