A Xunta recorre a cooficialidade do topónimo ría do Eo por vulnerar a normativa

A Xunta recorreu a decisión do Instituto Xeográfico Nacional sobre a denominación oficial da ría de Ribadeo, por considerar que outorgar ao topónimo ría do Eo carácter de nome alternativo vulnera a normativa reguladora da determinación dos topónimos oficiais. O Goberno galego presentou un recurso de alzada ante o Ministerio de Transportes, Mobilidade e Axenda Urbana tras a súa decisión, o pasado mes de novembro, de dar carácter de oficial ao topónimo ría do Eo como alternativa co mesmo nivel de uso que o de ría de Ribadeo.

Segundo explica nunha nota de prensa, partindo da incorrección xeográfica e semántica do topónimo ría do Eo, a Xunta quere facer valer a opción tecnicamente correcta, que pasaría por manter a forma ría de Ribadeo como a única oficial para denominar a ría en que desemboca o río Eo, deixando a outra opción como unha variante.

O Executivo autonómico argumenta que a súa postura conta co apoio de diferentes entidades como a RAG, o Consello da Cultura Galega, o Grupo ANTE de Investigación de Análise Territorial da USC, a Deputación Provincial de Lugo ou o Concello de Ribadeo. Ademais, sobre o argumento do Principado de Asturias para esixir o uso da forma ría do Eo, dado o "carácter tradicional" por un uso maioritario desta denominación na beira asturiana da ría desde 2007, a Xunta sinala que non se chegou a consenso na Comisión Especializada de Nomes Xeográficos, o órgano encargado do informe técnico para guiar a decisión respecto diso.

A Xunta tamén destaca que, segundo o informe da Comisión de Nomes Xeográficos e Cambios de Denominación da Real Sociedade Xeográfica, unha ría non pode estar adscrita, en ningún caso, a un río que desemboque nela, o que implicaría a incorrección da forma ría do Eo.

Engade que nesta ría desembocan outros tres ríos -Suarón, Monxardín e Grande- polo que incluír na denominación da ría a mención a só un deles "resultaría contrario á realidade xeográfica". Ademais dos razoamentos expostos, a Xunta apoia a súa posición na recomendación das Nacións Unidas sobre a normalización dos nomes xeográficos, que pretende lograr unha forma única para cada nome, e apunta que "sería un erro pensar que o topónimo ría de Ribadeo supón algún tipo de preeminencia para Ribadeo ou para Galicia e unha negación da súa condición tan asturiana como galega".