A Xunta destina 19 millóns ao mantemento do Camiño e elabora un plan de enogastronomía
O Goberno galego tamén aproba o expediente para construír un treito de oito quilómetros da autovía Santiago-A Estrada
O Consello da Xunta aprobou este mércores dous acordos en materia de turismo: un plan de 32 millóns para impulsar a enogastronomía e unha achega de 19 millóns para o mantemento do Camiño de Santiago.
Eses 19 millóns destinaranse nos próximos tres anos á limpeza ou mellora de sinalizacións das rutas xacobeas. Un investimento importante, di o presidente, pero rendible, polo retorno que deixan os cada vez máis peregrinos.
O Goberno galego tamén autorizou o plan de sostibilidade turística de enograstronomía que vai levar Galicia á Conferencia Sectorial de Turismo para captar 32 millóns de fondos Next Generation.
"O obxectivo é, con esta cantidade, dar o paso case definitivo para situar Galicia como destino enogastronómico de primeiro nivel. Hai un turismo de alto poder adquisitivo que se move en función destes destinos", explicou o presidente, Alfonso Rueda.
O plan prevé usar os terreos vitivinícolas tamén para o turismo, adaptar os aloxamentos para experiencias enogastronómicas ou crear unha rede de transporte entre as cinco rutas do viño de Galicia.
Autovía Santiago-A Estrada
Na súa reunión semanal, o Goberno galego tamén aprobou este mércores o expediente de información pública dun novo treito da autovía Santiago-A Estrada de case 8 quilómetros. A obra ten un orzamento de 60 millóns de euros.
