A Xunta amplía a petición ao TSXG para prohibir as reunións privadas de madrugada

A Xunta ampliou a súa petición de autorización ao Tribunal Superior de Xustiza de Galicia (TSXG) para poder prohibir a partir de mañá as reunións de non conviventes entre as 3 e as 6 da mañá, non só nas rúas e ámbitos públicos, senón tamén nos privados.

Segundo informaron fontes da Consellería de Sanidade, o Goberno galego xa remitiu esta petición ao tribunal para "a limitación de permanencia de grupos de persoas en espazos públicos ou privados en horario nocturno", entre as horas citadas.

Desta prohibición exceptúanse as persoas que vivan soas, que poderán formar parte dunha única unidade familiar de convivencia ampliada, e as persoas menores de idade, que poderán reunirse cos seus proxenitores en caso de que estes non convivan no mesmo domicilio.

Tamén se permitirá a reunión de persoas con vínculo matrimonial ou de parella, cando estes vivan en domicilios diferentes, así como para o coidado, atención, asistencia ou acompañamento a persoas menores de idade, maiores ou dependentes, con discapacidade ou especialmente vulnerables.

Igualmente estará permitida a pernoita no mesmo domicilio en caso de reunión ou reencontro familiar ou de achegados e "por causa de forza maior ou situación de necesidade", explicaron desde a Consellería.

Esta é a solicitude que a Xunta enviou ao TSXG, cunhas condicións similares ás do Nadal pasado, pero agora queda en mans do tribunal determinar se poderán entrar ou non en vigor mañá xoves ás doce da noite, tal e como pretende o Goberno galego, xa que precisan da autorización previa.

Na conferencia de prensa tras o Consello de la Xunta, o último do ano, o presidente galego, Alberto Núñez Feijóo, dixo esta tarde que xa se presentou a solicitude, pero sen incluír que a prohibición ía afectar tamén o ámbito privado, á parte da o público, do que se informou posteriormente.