A xornada de bombeiros galegos na Guaira, "zona de guerra": unha "montaña rusa" de sensacións
"Os cans e os seus guías van dun oco a outro, esperando o ladrido que nos indique que hai unha persoa con vida e que teremos que buscar a forma de sacala"
Elevan a 19 o número de españois falecidos nos terremotos de Venezuela
(IG/briegal_org)
Bombeiros galegos da ONG Briegal, despregados na Guaira, o estado costeiro de Venezuela máis golpeado polo dobre terremoto e convertido nunha "zona de guerra", para colaborar nas tarefas de rescate, describiron como foi a súa xornada deste luns, en que traballaron 13 horas e viviron unha "auténtica montaña rusa de sensacións, vivencias e estado de ánimo".
Este luns foi o seu segundo día no país latinoamericano e, durante a primeira parte da xornada, centraron os seus traballos en Los Corales, na parroquia de Caraballeda.
"Estivemos a revisar cos nosos guías caninos e as súas inseparables cadelas varios edificios nos que se dubidaba que fosen rastrexados. En ningún deles houbo ningún positivo", detallou este equipo galego, formado por dous bombeiros da Coruña, outros tantos de Ferrol, un de Estaleiros Navantia e dous do Consorcio Provincial da Coruña.
Nesa zona, explicaron, os edificios "caeron de forma aleatoria", polo que puideron atopar uns inmobles "totalmente colapsados e, ao lado, outros intactos".
Ao mediodía do luns foron trasladados a outra zona en que "non" estiveran ata o momento. "A realidade da magnitude do que pasou aquí sacudiunos de cheo. A zona cero da Guaira, é unha zona de guerra", afirmaron.
O panorama é desolador: avenidas "completamente arrasadas", bloques residenciais de 12 alturas "reducidos á nada" e "miles de persoas" na rúa tratando de manter a esperanza de atopar sobreviventes.
"A xente vén e pídeche que vaias dun sitio a outro porque aseguran ter unha proba de vida que queren que comprobes. E iso facemos: os cans e os seus guías van dun oco a outro e nós tratamos de facer máis segura a súa misión, esperando o ladrido que nos indique que hai unha persoa con vida e que teremos que buscar a forma de sacala", detallaron.
Como o día anterior e coa "mirada resignada" dos guías caninos -Capa, Miguel e Rookie-, as cadelas Argui, Sidney e Quenia "tampouco ladraron" este luns. "Este martes intentarano de novo e nós seguiremos atentos a elas", subliñaron.
