A vicepresidenta Yolanda Díaz ofrece ao Goberno valenciano os ERTE por forza maior
Permiten a suspensión temporal do contrato de traballo ou a redución da xornada e que os traballadores cobren o desemprego sen que se consuma a prestación
Yolanda Díaz, á dereita da imaxe, na xuntanza do comité de crise pola DINA. EFE/Moncloa/ José Manuel Álvarez
A vicepresidenta segunda e ministra de Traballo, Yolanda Díaz, conversou este venres cos conselleiros de Emprego da Comunidade Valenciana e Castela-A Mancha para coñecer a situación dos traballadores afectados pola DINA e poñer á súa disposición os mecanismos dos ERTE e a Inspección de Traballo.
Segundo o Ministerio de Traballo, as empresas afectadas pola DINA poden solicitar un Expediente de Regulación Temporal de Emprego (ERTE) por forza maior, unha ferramenta que incorporou a reforma laboral para situacións catastróficas.
Estes ERTE, regulados no artigo 47 do Estatuto dos Traballadores, permiten a suspensión temporal do contrato de traballo ou a redución da xornada das persoas traballadoras, que poden recibir protección por desemprego sen que se consuma a prestación.
Yolanda Díaz tamén mantivo conversacións cos axentes sociais das dúas comunidades autónomas para coñecer as súas demandas e acordou reunirse con eles de forma presencial proximamente.
