A pensión media increméntase en Galicia un 10,17 %, a suba máis alta do Estado
Os pensionistas galegos cobran de media 1.160,85 euros
O aumento da pensión media de xubilación no último ano, un 9,83 % para o conxunto do Estado, deixa datos desiguais por comunidades autónomas, e Galicia sitúase como a comunidade onde máis subiu, un 10,17 % de incremento.
Séguena Castela e León (10,11 %) e Estremadura (10,08 %). Os menores incrementos son os de Madrid (9,37 %), Asturias (9,38 %) e as Canarias (9,46 %).
En total hai en Galicia 484.122 pensionistas que perciben unha media de 1.160,85 euros, fronte aos 482.957 que había hai un ano e cobraban de termo medio 1.053,71 euros.
Por provincias, a pensión media máis alta é a da provincia da Coruña, 1.224,19 euros, seguida moi de preto por Pontevedra, con 1.221,37 euros. Pola contra, a máis baixa é a de Ourense, con 972,31 euros de media, mentres que Lugo supera por pouco os mil euros, 1.037,38.
É precisamente nas provincias coas pensións máis baixas onde o incremento é maior, e así Ourense, cunha suba do 10,36 %, e Lugo, onde medra un 10,68 %, sitúanse á cabeza de España.
