Un incendio con catro focos en Ponteceso obriga a desaloxar Corme Aldea e a mobilizar a UME
É o sexto lume que se rexistra no concello desde o sábado e a Xunta apunta a súa clara intencionalidade
Declarada a situación 2 tamén nun incendio en Camariñas, con 20 hectáreas calcinadas
Outro lume activo na Fonsagrada leva arradas máis de 90 hectáreas
A Xunta solicitou a intervención da Unidade Militar de Emerxencias (UME) ante o avance do incendio que afecta o municipio coruñés de Ponteceso e obrigou a desaloxar veciños da parroquia de Corme Aldea.
🔴 Activada la @UMEgob para trabajar en las tareas de extinción del incendio forestal en Ponteceso #ACoruña.
— Ministerio Defensa (@Defensagob) August 5, 2025
💛 Gracias por estar ahí, siempre. https://t.co/g3KLUxshaQ
A Consellería do Medio Rural informou da petición na tarde deste martes, despois de que a subdelegada do Goberno na Coruña, María Rivas, ofrecese á Xunta todos os medios necesarios para afrontar a situación, dada a proximidade das lapas ás casas.
Nos labores de extinción participan dous avións a pesar de que as condicións meteorolóxicas non son favorables para os medios aéreos.
No operativo traballan 10 brigadas, 9 motobombas, 2 pás, 7 axentes, 1 técnico, e 3 unidades técnicas de apoio.
Ponteceso leva 6 incendios importantes en só 3 días con máis de 500 hectáreas ardidas
Ponteceso leva varios días afectado por diversos incendios forestais que xa arrasaron máis de 500 hectáreas. O lume da parroquia de Cospindo está extinguido tras queimar 245 hectáreas, mentres permanecen estabilizados os de Brantuas (170 hectáreas), A Graña (preto de 100 hectáreas) e Cores, iniciado tamén nas últimas horas.
O conselleiro da Presidencia, Diego Calvo, está convencido de que todos foron intencionados.
Nivel 2 tamén en Camariñas
Tamén avanza outro incendio no concello coruñés de Camariñas, parroquia de Xaviña, no que se decretou a Situación 2 pola súa proximidade ao núcleo de Pedrouso. Afecta unha superficie de arredor de 20 hectáreas.
Lume en Mondariz
Mentres tanto, Medio Rural tamén informou doutro incendio en Mondariz (Pontevedra), na parroquia de Riofrío, que afecta máis de 20 hectáreas. Esta noite dábao por controlado.
Incendio na Fonsagrada
Incendio de 90 hectáreas na Fonsagrada
Un novo incendio forestal en Galicia afecta o municipio lucense da Fonsagrada, na parroquia de Monteseiro, onde arderon xa máis de 90 hectáreas, segundo os últimos datos da Consellería do Medio Rural, desta mesma noite.
O lume detectouse arredor das 15:00 horas.
