A Fiscalía pide seis anos de cárcere para un home por agresión sexual a unha menor e parente de 11 anos

A Fiscalía de Pontevedra pide 6 anos de prisión para un home acusado dun delito de agresión sexual sobre unha menor de 11 anos con quen ten parentesco.

O xuízo celebrarase o martes na sección quinta da Audiencia Provincial de Pontevedra, con sede en Vigo, e a Fiscalía pedirá que se celebre a porta pechada.

Os feitos sucederon en agosto de 2024 no domicilio do acusado, que ten relación de parentesco coa vítima.

O Ministerio Público considera que concorre a agravante de reincidencia e a atenuante analóxica de embriaguez.

Ademais dos seis anos de prisión, solicita para o acusado que se lle prohiba estar a menos de 200 metros da vítima e comunicarse con ela por un tempo de 8 anos.

Tamén require que se lle impoña ao acusado a pena de liberdade vixiada durante cinco anos coa obrigación de participar en cursos formativos en materia de educación sexual, así como a pena de privación da patria potestade ou de inhabilitación especial para o exercicio dos dereitos da patria potestade, tutela, curatela, garda ou acollemento por tempo de seis anos.

A Fiscalía solicita tamén a inhabilitación para calquera profesión, oficio ou actividades, sexan ou non retribuídos, que implique contacto regular e directo con persoas menores de idade por un tempo de 10 anos a maiores ao da duración da pena de privación de liberdade que se lle impoña na sentenza.

A Fiscalía require que indemnice a menor con 3.000 euros en concepto de responsabilidade civil.