A erupción da Palma vólvese moi explosiva
Preocupa que chova e se formen lodos de cinza
Os nenos seguirán con clases virtuais este venres
Máis de medio cento de terremotos nesta xornada
As distintas bocas do volcán expulsan cinza sen parar
O volcán do Cumbre Vieja soa este xoves con máis forza ca nunca e a enorme columna de cinzas que expulsa sen descanso vese dende toda a illa.
A actividade explosiva das últimas horas produce unha gran cantidade de gases e tamén un ruído continuo e enxordecedor.
As distintas bocas do volcán altérnanse na expulsión de lava e cinzas. Do interior da terra segue saíndo magma en grandes cantidades. Pero a cinza preocupa moito nestes momentos. Porque, se chove, poderían formarse lodos volcánicos e complicar aínda máis a situación.
Numerosas persoas traballan en toda a illa para retirar a cinza que, aínda así, segue acumulándose en grandes cantidades. "Si, demasiados días xa e con ganas de que iso termine e pase todo", di un operario da limpeza.
A calidade do aire obriga a que os rapaces sigan coas clases na casa durante este venres.
Algúns expertos ven indicios de que a actividade do volcán podería estar comezando a remitir. Pero ninguén quere dar esperanzas firmes.
Na illa producíronse este xoves máis de medio cento de terremotos. A lava cubriu xa 998 hectáreas e arrasou máis de 2.700 edificios.
O presidente do Goberno, Pedro Sánchez, visitará de novo A Palma este venres. É a sexta vez que viaxa á illa dende que comezou a erupción do volcán.
