A conselleira de Política Social rexeita a imposición de acoller 317 menores migrantes

A conselleira de Política Social, Fabiola García, acusou este mércores o Goberno central de obrigar a Xunta a "crear guetos" coa súa política de distribución de menores migrantes entre comunidades autónomas. García insistiu en que Galicia non o fará nin aceptará "ningunha imposición".

"Envíasennos 317 menores, teremos que habilitar centros específicos, e nós apostamos por un sistema de integración completa, porque é a forma máis rápida e eficaz de que se integren en Galicia e na nosa cultura", afirmou durante unha visita a unha residencia de tempo libre en Nigrán (Pontevedra).

Galicia afirma non ter problemas de integración

Segundo García, en Galicia "non hai ningún tipo de incidencia ata o momento cos inmigrantes precisamente por este sistema de integración e protección de menores, que é un exemplo a seguir".

Advertiu tamén que "non se pode ser solidario co que non se ten" e que, na actualidade, a comunidade presenta unha sobreocupación do 108%, "sen unha soa cama dispoñible para acoller menores estranxeiros non acompañados".

García expresou a disposición da Xunta "a seguir acollendo menores migrantes", pero subliñou que debe facerse "de forma planificada, coordinada e co financiamento necesario". "O que non imos admitir son imposicións por parte do Goberno de España e unha repartición desigual entre comunidades autónomas, mentres a Galicia lle corresponden supostamente 317 menores e a Cataluña ou o País Vasco, cero", denunciou.

Resposta ás críticas de Amnistía Internacional

Sobre as críticas de Amnistía Internacional, que instou a Xunta a afastar da disputa política a acollida digna e corresponsable da infancia migrante bloqueada nas Canarias e Ceuta, García reiterou que Galicia é "exemplo de integración real".

"Temos un sistema de integración completa: cando chega un menor migrante intégrase nun centro ou nunha casa de acollida xunto con outros menores galegos, cunha coordinación e integración en tempo real", explicou.