A China advirte que Panamá pagará un alto prezo se non lle devolve o control sobre os portos da Canle
A China advirte que Panamá pagará un alto prezo se non lle devolve o control sobre os portos da Canle
O Tribunal Supremo de Panamá declarou inconstitucional o contrato de concesión dos portos, que levaba 30 anos en vigor
Segundo Pequín, o fallo é absurdo desde o punto de vista legal e extremadamente ridículo e reflicte a servidume de Panamá ante a hexemonía estadounidense
REUTERS/Aris Martinez
A China cualifica de absurda e extremadamente ridícula a sentenza do Tribunal Supremo panameño que anula a concesión de dous portos próximos á canle de Panamá a unha empresa de Hong Kong e advirte ás autoridades do país centroamericano que pagarán un alto prezo se non o reverten.
"A sentenza é absurda desde o punto de vista legal, ten fallas na lóxica e é extremadamente ridícula", indicou nun comunicado publicado onte á noite o Executivo chinés.
Pequín denuncia a servidume de Panamá ante a hexemonía estadounidense
Segundo Pequín, as autoridades panameñas deberían corrixir o seu rumbo. Advirte que, de persistiren nesa idea, pagarán inevitablemente un alto prezo en termos políticos e económicos.
En opinión da China, o texto reflicte a total servidume e submisión das autoridades panameñas ante a hexemonía estadounidense. Lembra que a concesión estivo en vigor durante case 30 anos, que investiron 1.800 millóns de dólares en Panamá creando miles de postos de traballo e que os procesos de renovación do contrato foron validados polas autoridades panameñas e os organismos reguladores.
"A decisión equivale a destruír a credibilidade do país, causa un profundo dano ao desenvolvemento económico e menoscaba gravemente as regras do comercio internacional". Para a China, a insistencia das autoridades panameñas equivale a pegarse un tiro no pé.
