A bombona de butano baixa o 4,9 por cento

A bombona de butano baixará un 4,9% a partir deste martes, 16 de maio, ata os 15,96 euros, o prezo máis baixo rexistrado nos últimos doce meses, segundo unha resolución publicada onte no Boletín Oficial do Estado (BOE).

En concreto, o prezo de venda ao público máximo da bombona de butano descenderá en 0,83 euros, ata os 15,96 euros, fronte aos 16,79 euros vixentes desde o pasado 21 de marzo. O custo máximo dos gases licuados do petróleo (GLP) en envases de 8 a 20 quilogramos (a tradicional bombona de butano) revísase bimestralmente o terceiro martes do mes, por resolución da Dirección Xeral de Política Enerxética e Minas.

Esta revisión calcúlase en función do custo da materia prima (propano e butano) nos mercados internacionais, así como do custo do transporte e a evolución do tipo de cambio euro-dólar.

En concreto, esta redución débese, principalmente, á forte caída da cotización das materias primas (-25,8%) e en menor medida, á apreciación do euro fronte ao dólar (+0.9%), que está amortecida polo superávit existente, que aumenta desde 0,97 euros/botella a 1,76 euros/botella.

Por outra banda, dita revisión do prezo, á alza ou á baixa, está limitada ao cinco por cento, acumulándose o exceso ou defecto de prezo para a súa aplicación en posteriores revisións.