Publicador de contidos

Publicador de contidos

A Audiencia de Zaragoza arquiva o caso Ghali para a exministra Laya ao non ver indicios de delito

A Audiencia de Zaragoza arquiva o caso Ghali para a exministra Laya ao non ver indicios de delito

Concluíron que o pertinente é "revogar a resolución" en que se acordou manter a imputación da exministra e declarar o sobresemento das actuacións, "sen prexuízo da súa reapertura para o caso de que resultasen novos indicios contra a dita persoa"

González Laya di que volvería acoller o líder polisario por razóns humanitarias 

G24.gal 27/05/2022 09:59

A Audiencia Provincial de Zaragoza ordenou o arquivo do procedemento que continúa no Xulgado de Instrución Número 7 desa localidade contra a exministra de Asuntos Exteriores Arancha González Laya ao non ver indicios de delito na súa actuación no marco da entrada en España do líder da Fronte Polisario Brahim Ghali, que tivo lugar na noite do 18 de abril de 2021 e se produciu sen pasar controis de fronteira nin documentación de cara a ser trasladado a un hospital de Logroño para ser atendido por covid–19.

Nun auto asinado este xoves, os maxistrados da Sección Terceira corrixiron o xuíz Rafael Lasala ao consideraren que non poden compartir o seu criterio para manter como investigada a que fora titular de Exteriores.

"Aínda que é innegable que a Señora González era coñecedora da intención de que o Señor Ghali fora tratado en España e tomou parte activa nos preparativos que conduciron a iso, porén, non existen indicios que soporten a conclusión de que coñecía a existencia dun interese xudicial sobre aquela persoa", precisaron.

Concluíron que o pertinente é "revogar a resolución" en que se acordou manter a imputación da exministra e declarar o sobresemento das actuacións, "sen prexuízo da súa reapertura para o caso de que resultasen novos indicios contra a dita persoa".

A Audiencia Provincial de Zaragoza estimou o recurso que presentou a Avogacía do Estado en nome de González Laya. Os servizos xurídicos defenderon que non había elementos que permitisen acreditar un posible delito de prevaricación, de encubrimento ou de falsidade documental por parte da exministra.

A Avogacía insistiu en que o que procedía era o arquivo para que non se alongase "innecesariamente" unha investigación que supoñía "afeccións e consecuencias desfavorables" para a extitular de Exteriores. A Fiscalía coincidiu en que debía pecharse a causa para a exministra.

González Laya di que volvería acoller o líder polisario por razóns humanitarias 

Arancha González Laya sostivo que a "satisfai" o arquivo do caso Ghali, pero lamentou que con este procedemento xudicial "se enlamase" unha decisión "estritamente humanitaria", en relación coa estadía do líder da Fronte Polisario Brahim Ghali, atendido nun hospital de Logroño por coronavirus.

"Alégrame, satisfaime que a Audiencia de Zaragoza, na primeira ocasión que tivo de pronunciarse sobre este asunto, confirmase esta versión contra o criterio do xuíz instrutor", trasladou a exministra nunha entrevista en Onda Cero.

Laya asegurou que esta decisión é "importante" porque aclara que se atendeu a Ghali por razóns humanitarias e de acordo coa lei "e conclúe así un caso que nunca debeu ocorrer".

Criticou que unha decisión política como foi esta se dirimise en sede xudicial, e ademais en "sede xudicial penal", pois, segundo a ex-xefa da diplomacia española, debería ser en sede parlamentaria.

"Eu no meu labor sempre me guiei por defender os intereses e os valores do noso país", apuntou, á par que destacou que no exercicio das súas funcións como ministra buscou protexer a imaxe e a posición internacional de España.

Publicidade
Publicidade
Publicidade