Un adolescente mata os seus avós e profesores nun tiroteo escolar en Tailandia

Un adolescente de 14 anos matou este venres os seus avós na vivenda que compartían e despois acudiu á súa escola ao norte de Bangkok, onde disparou contra profesores e compañeiros, deixando polo menos 5 falecidos - todos mestres e persoal do centro- e unha trintena de feridos antes de suicidarse, segundo as autoridades do país.

O tiroteo, o máis grave en Tailandia en case catro anos, foi "planeado con coidado", dixo o primeiro ministro tailandés, Anutin Charnvirakul, desde o lugar dos feitos, a prestixiosa Escola Debsirin en Nonthaburi (uns quince quilómetros ao noroeste de Bangkok).

As primeiras investigacións apuntan a que o mozo sufría de "tensión académica" ante a suposta presión dos seus avós para que sacase boas notas, afirmou o dirixente aos medios.

"Polo que puidemos saber, o ataque comezou na súa casa, onde atacou os seus avós, que foron as súas primeiras dúas vítimas", sinalou Anutin, quen aclarou que un deles fora profesor, sen especificar se desa mesma escola.

Despois dirixiuse ao centro, de acordo coa reconstrución policial, e disparou cunha pistola que pertencía ao seu avó contra docentes e alumnos, deixando alí un saldo preliminar de cinco falecidos e máis dunha trintena de feridos, nove deles en estado crítico, dixo Anutin.

A policía tailandesa engadiu que non se rexistrou a morte de ningún estudante, ao contrario do que se informara previamente, e que todos os falecidos son profesores e persoal do centro. Non detallou as identidades dos feridos.

O adolescente quitouse despois da vida, cando aínda tiña "máis de 30 balas" dispoñibles, agregou o dirixente.

"Non houbo sinais de alerta"

Un familiar dun dos profesores falecidos afirmou a un grupo de xornalistas, entre eles EFE, que, segundo as conversacións co seu parente, non cre que houbese "sinais de alerta".

"Non houbo ningún problema (no seu ensino). Todo era normal. Non había nada fóra do común", declarou pedindo o anonimato, e aclarou que o seu familiar falecido era o vicedirector do centro e levaba moito tempo traballando nesta escola.

Poucas horas despois do ataque, do que comezou a informarse a través de contas en redes sociais da policía ao redor das 05:00 hora galega, o centro permanecía desaloxado e baixo resgardo de axentes e persoal do Ministerio de Educación.

Unha sucesión de zapatos e mochilas abandonados daban conta da saída precipitada dos alumnos deste centro para estudantes de entre 12 e 18 anos, mentres axentes da policía marcaban con sinalizadores os cascos de bala esparexidos pola escola, que permanecerá pechada ata o 17 de agosto.

O colexio pertence a unha das redes de escolas públicas máis prestixiosas e antigas do país, cuxa esixencia educativa non chega ao nivel da de nacións asiáticas como Corea do Sur, A China ou Singapur, aínda que é habitual a elevada competencia para ingresar en centros reputados.

Laxitude normativa

O tiroteo é o segundo nunha escola no que vai de ano, pois o pasado febreiro a directora dun colexio de Hat Yai (sur do país) morreu despois de que un home irrompese a tiros no centro, o que volve poñer sobre a mesa o debate da tenza de armas de fogo no país, onde sucesos así non son inusuais.

Tailandia ten unhas 15,14 armas de fogo por cada 100 civís, segundo datos de Small Arms Survey, e gran facilidade para acceder a elas por parte do persoal do Exército e a Policía.

A principal lei tailandesa nesta materia, considerada laxa e anticuada, data de 1947 e delega no Ministerio do Interior a emisión de licenzas de posesión e portación de armas de fogo a civís, á vez que contempla amplas excepcións para as forzas de seguridade.

"Gustaríame que se tomasen medidas máis rigorosas, porque un incidente como este non debería ocorrer", sinalou á prensa o familiar do subdirector falecido.

En liñas similares expresouse unha docente do centro, Mei, de 45 anos, quen dixo entre bágoas a EFE que nunca pensou "que isto puidese suceder neste colexio".

Desde alí, o conservador Anutin, afín ao poderoso exército -cuxa influencia no país é un dos aparentes motivos detrás da tradición de posuír armas-, indicou que unha das súas "tarefas pendentes é promulgar a nova lei" que "aínda está en proceso".

O tiroteo deste venres foi o máis grave en Tailandia desde outubro de 2022, cando un expolicía abriu fogo no interior dunha escola infantil do nordés de Uthai Sawan (nordés) e matou cun rifle automático e un coitelo a 34 persoas, entre elas 22 nenos e unha profesora embarazada.