7 mortos, entre eles estudantes, e 15 feridos nun tiroteo nunha escola en Tailandia

A Policía tailandesa informou este venres de que sete persoas morreron, entre elas o presunto autor, tres profesores e tres estudantes, e outras quince resultaron feridas tras un tiroteo nunha escola de secundaria na provincia de Nonthaburi, ao norte de Bangkok.

Segundo o informe, divulgado por unha axente policial da cadea de televisión da Policía en Facebook, dous dos feridos atópanse en condición crítica, sen especificar se son estudantes da escola, unha prestixiosa institución pública tailandesa.

O servizo público de radiodifusión, Thai PBS, informou así mesmo de sete mortos, incluído o sospeitoso, quen presuntamente se quitou a vida, e 15 feridos, aínda que se espera que as cifras poidan variar ao ser informes preliminares.

Medios locais, entre eles Thai PBS, indicaron que o presunto autor é un estudante de secundaria de 15 anos, o que non confirmou a Policía tailandesa. Descoñécense os posibles motivos do tiroteo.

Os primeiros reportes da Policía sobre o suceso a través das súas contas en redes tiveron lugar ao redor das 05:00, hora galega.

As autoridades indicaron que o sospeitoso se atopaba dentro da sala de computadores do centro educativo, identificado por medios locais como a Escola Debsirin Nonthaburi, situada uns 15 quilómetros ao noroeste da capital tailandesa.

Trátase dun prestixioso centro educativo para alumnos de entre 12 e 18 anos que pertence a unha das redes de escolas públicas máis prestixiosas e antigas do país, ás que acudiron altos cargos políticos de Tailandia.

O país conta cun elevado índice de armas de fogo por habitante e os tiroteos non son inusuais, con facilidade de acceso ás mesmas para persoal do exército e a policía, e normativas laxas e anticuadas para a súa adquisición por parte da poboación.

O pasado febreiro, a directora dunha escola de Hat Yai, no sur de Tailandia, morreu noutro tiroteo, despois de que un home irrompese a tiros no centro, alén de tomar como reféns a profesores e alumnos, logo liberados. 

Atopan mortos na súa casa os avós do presunto autor dos disparos

As autoridades tailandesas acharon mortos na súa vivenda o avó e a avoa do sospeitoso do tiroteo este venres nunha escola de secundaria, polo que se presume que podería empezar na casa, segundo as primeiras investigacións.

A información inicial indica que a arma de lume empregada no tiroteo era unha pistola compacta rexistrada a nome do avó do sospeitoso, un antigo profesor, dixo no lugar do suceso o viceministro tailandés de Interior, Polapee Suwunchwee, ante os medios de comunicación.