O presidente do Consello Xeral do Poder Xudicial non votou o texto da amnistía para evitar a inxerencia política
O presidente do Consello Xeral do Poder Xudicial non votou o texto da amnistía para evitar a inxerencia política
Vicente Guilarte explica que votar implicaría unha posición institucional cando aínda non existe unha proposición de lei
O órgano de goberno dos xuíces aprobou o luns unha declaración contra a eventual lei por ser unha "medida de abolición do Estado de dereito"
![O CXPX aprobou a declaración este luns nun pleno extraordinario](https://img-g24-crtvg.flumotion.com/prog24/2023/20231106/cxpxextraordinario.png)
Vicente Guilarte explicou que se desvinculou da declaración institucional que este órgano aprobou o luns contra a futura lei de amnistía porque "implica" apoiar "unha opción política" e fai que o Consello puidese entenderse como "un suxeito activo do debate político".
O Consello Xeral do Poder Xudicial, con maioría conservadora, aprobou unha declaración contra a amnistía, que tacha de "medida de abolición do Estado de dereito", "violenta a Constitución" e converte a Xustiza "nunha quimera".
O presidente do CXPX foi o único que votou en branco
Respecto diso, Guilarte, que foi o único que votou en branco, explica que esta declaración "á marxe da convicción persoal que cada un poida ter, reflicte, quéirase ou non, a posición dun dos actores políticos do sistema, crítica coa do seu opoñente".
"E, consecuentemente, dada a dramática bipolarización existente, a súa aceptación implica fatalmente unha posición institucional a favor dunha opción política cando aínda non existe unha proposición ou anteproxecto", sinala o presidente CXPX.
Na súa opinión: "É desexable a falta de inxerencia doutros poderes no que resulta ser a actividade xurídica e, asemade, tamén o é que o CXPX evite a inxerencia na actividade política".
Por iso, considera Guilarte: "En tanto non se plasme a hipotética decisión sobre a amnistía nun anteproxecto ou proposición de lei é prematuro un pronunciamento do poder xudicial, pois a súa intervención podería entenderse como a dun suxeito activo do debate político".
Desta forma, ve oportuno evitar o pronunciamento de igual maneira que tamén se mostraría contrario, "quizais máis acusadamente", a unha declaración en sentido contrario.