Israel expande as súas operacións terrestres cara ao sur da Franxa de Gaza
Israel expande as súas operacións terrestres cara ao sur da Franxa de Gaza
As tropas hebreas intensifican os ataques e matan máis de 700 persoas en 24 horas
O xefe do Estado Maior do Exército israelí, Herzi Halevi, confirmou a expansión das operacións militares terrestres cara ao sur de Gaza. Horas antes, ordenaran a evacuación de seis barrios da cidade de Jan Yunis.
Ata o de agora, a ofensiva xudea concentrárase no norte do enclave palestino, castigado duramente tras a fin da tregua. Nas últimas 24 horas morreron máis de 700 persoas na Franxa.
"A ocupación israelí matou máis de 700 cidadáns palestinos nas últimas 24 horas e máis de 1,5 millóns atópanse desprazados na Franxa de Gaza", anunciou a través da súa canle oficial de Telegram o grupo islamita Hamás.
O primeiro ministro israelí, Benjamín Netanyahu, reafirmou este sábado que vai continuar coa súa "guerra xustificada" malia a crecente presión internacional para acordar un alto o fogo, dada a profunda degradación da situación humanitaria na zona.
"A ocupación israelí continúa ampliando os seus ataques contra civís tras a fin da tregua, e non deixou nin un centímetro na Franxa sen bombardeos", comentou pouco antes Ashraf al Qudra, voceiro do Ministerio de Sanidade gazatí.
Dende o inicio da guerra, a Franxa suma 15.207 vítimas mortais e 40.652 feridas. O 70 % son menores e mulleres.
Despois da guerra
Nunha conferencia de prensa televisada, Netanyahu tamén asegurou que cando remate a guerra non vai permitir o control da Franxa de Gaza por parte da Autoridade Nacional Palestina (ANP), que goberna partes reducidas da Cisxordania ocupada.
Posición totalmente oposta á dos Estados unidos, segundo manifestou a súa vicepresidenta, Kamala Harris, en Dubái, onde participou no Cume do Clima.
"Queremos ver unha Gaza e Cisxordania unificadas baixo a Autoridade Nacional Palestina, e as voces e aspiracións palestinas deben estar no centro deste traballo", aseverou.
A mandataria tamén urxiu a Israel a "facer máis" para protexer a poboación palestina. Segundo dixo, "a magnitude do sufrimento civil e as imaxes e os vídeos procedentes de Gaza son devastadores".
