Venezuela libera unha presa hispanovenezolana, Sofía Sahagún
Albares, xa anunciara a liberación de tres cidadáns españois que se atopaban encarcerados en Venezuela, que se unen ao grupo de cinco presos liberados anteriormente e que "xa están en España"
REUTERS/Gaby Oraa
A hispanovenezolana Sofía Sahagún Ortiz, que se atopaba presa nun cárcere venezolano desde o mes de outubro de 2024, foi liberada este martes, segundo informou a ONG Foro Penal e a Plataforma Unitaria Democrática (PUD), que agrupa á oposición maioritaria en Venezuela.
Sahagún foi excarcerada xunto a outro grupo de entre 56 e 76 presos políticos, cinco días despois de que o presidente do Parlamento, Jorge Rodríguez, anunciase a liberación de "un número importante de persoas".
O director de Foro Penal, Alfredo Romero, confirmou este martes en X a excarceración de Sofía Sahagún, quen, indicou, está de camiño a Madrid.
Este mesmo martes, o ministro de Asuntos Exteriores, Unión Europea e Cooperación, José Manuel Albares, xa anunciara a liberación de tres cidadáns españois que se atopaban encarcerados en Venezuela, que se unen ao grupo de cinco presos liberados anteriormente e que "xa están en España".
En declaracións a Catalunya Ràdio, Albares detallou que un dos tres liberados, unha muller, da que non deu o seu nome, sairía hoxe mesmo para España, mentres que outra persoa "decidiu manterse en Venezuela", e a terceira "está a pensar se prefire" quedar alí ou regresar.
Sofía Sahagún, ama de casa e nai de dous adolescentes xemelgos, con nacionalidade española-venezolana, foi detida o 23 de outubro de 2024 no aeroporto internacional de Maiquetía (Caracas) acusada de terrorismo cando se dispoñía a viaxar a España, informou a ONG nunha rede social. Segundo Foro penal, non tivo dereito á defensa.
