Un amplo dispositivo busca dous menores que puideron caer ao mar en Gran Canaria
Un amplo dispositivo busca dous menores que puideron caer ao mar en Gran Canaria
Acudiran a pescar á baía, onde atoparon os seus obxectos persoais
Os efectivos buscan por terra, mar e aire os dous menores
Dispositivos de mar e aire na busca dos dous menores (EFE)
Dende este venres, Emerxencias e o exército buscan dous menores de 16 e 17 anos que puideron caer ao mar nas inmediacións da praia de El Confital, nas Palmas de Gran Canaria. A ambos perdéuselles a pista a última hora da tarde do venres.
Este sábado retomaron as tarefas para tentar localizar os dous mozos, que, segundo informaron fontes do dispositivo de emerxencias, acudiran a pescar a esta zona da baía. Os seus obxectos persoais foron localizados o venres pola noite.
A chamada de emerxencia recibiuna o Centro Coordinador de Emerxencias e Seguridade (CECOES) sobre as 19:15 do venres, polo que se mobilizaron diferentes recursos que colaboran dende ese momento nas tarefas de procura.
No dispositivo por terra, mar e aire, participan unha dotación de Bombeiros do parque do Porto, militares da base do Illote, o Servizo Aéreo de Rescate (SAR) do Exército do Aire, efectivos de Salvamento Marítimo, Policía Local das Palmas de Gran Canaria, Policía Nacional, Garda Civil e Servizo de Urxencias Canario (SUC).
Sobre o terreo tamén se atopa a unidade de drons dos bombeiros, que se retirou tarde na noite do venres e se volveu activar este sábado. Dende esta mañá tamén están na procura o Grupo Especial de Actividades Subacuáticas (GEAS) da Garda Civil.
Por aire atópanse traballando un helicóptero do SAR, outro de Salvamento Marítimo e un do Grupo de Emerxencias e Salvamento (GES) do Goberno de Canarias.
Por mar, ademais dos GEAS, traballan o patrulleiro Río Tambre da Garda Civil e o Guardamar Urania de Salvamento Marítimo.
