Rusia pon en servizo o mísil intercontinental Bulavá de emprazamento marítimo

Rusia puxo en servizo o mísil intercontinental Bulavá de emprazamento marítimo, un dos piares da terna nuclear rusa e que é capaz de superar o escudo antimísiles dos Estados Unidos, segundo anunciou este martes o seu construtor xeral, Yuri Solomónov.

O decreto correspondente foi asinado o 7 de maio polo presidente ruso, Vladímir Putin, asegurou á axencia TASS. O Instituto de Termotecnia de Moscova desenvolveu desde 1998 ese mísil, que ten un alcance de 9.000 quilómetros e pode portar entre 6 e 10 oxivas nucleares. Os Bulavá son lanzados desde submarinos atómicos de última xeración.

Segundo o portal Meduza, efectuáronse 40 lanzamentos de proba con este mísil, sete dos cales foron declarados errados. Os repetidos fallos nos ensaios dos Bulavá obrigaron a atrasar durante anos a súa produción en serie, o que incrementou notablemente o gasto.

Sete submarinos capaces de portar ata 16 foguetes Bulavá atópanse a día de hoxe ao servizo da Armada rusa. Os Bulavá son, xunto aos mísiles Tópol de emprazamento terrestre, unha das tres patas do arsenal nuclear ruso xunto aos bombardeiros nucleares e os submarinos atómicos.

Rusia sempre confiou en que os Tópol e os Bulavá lle permitan manter a paridade nuclear cos Estados Unidos polo menos durante o próximo medio século. Nos últimos anos o presidente ruso, Vladímir Putin, ordenou priorizar o desenvolvemento de armamento hipersónico.