Rusia bombardea un teatro de Mariupol onde había centos de refuxiados
O vicealcalde de Mariupol asegura que no teatro se agochaban máis de mil persoas
O edificio quedou "completamente destruído", segundo as fontes ucraínas
Rusia di que está preto dun acordo sobre seguridade con Ucraína
Desfeita polos bombaderos na localidade ucraína de Mariupol.
Efectivos rusos bombardearon este mércores un teatro que servía de refuxio a centos de persoas residentes nesta cidade asediada de Mariupol en Ucraína e causaron un número aínda indeterminado de vítimas, segundo fontes ucraínas.
O Parlamento de Ucraína informou de que no interior do teatro, que quedou reducido a cascallos, había moitos cidadáns agochados. Descoñécese polo momento se hai superviventes.
As forzas ucraínas confirman tamén que nos arredores do edificio se desenvolveu unha forte batalla e ninguén pode acceder á zona.
Serhii Orlov, vicealcalde de Mariupol, asegurou que no teatro se agochaban entre 1.000 e 1.200 persoas e que o edificio "está completamente destruído".
"Outro crime de guerra atroz cometido por Rusia en Mariupol", dixo o ministro ucraíno de Exteriores Dmitro Kuleba.
Bombardeos na cidade ucraína de Mariúpol
A situación é desesperada desde hai días en Mariupol, unha estratéxica cidade portuaria á beira do mar interior de Azov situada entre a península anexionada de Crimea e o leste separatista do Donbás, polo que a súa captura é un obxectivo prioritario de Rusia.
"Houbo un masivo ataque ruso sobre o Drama Theater, onde se agochaban centos de inocentes civís", escribiu Kuleba en Twitter.
Pola súa banda Rusia nega o ataque ao teatro de Mariupol.
