Rueda e os presidentes do PP piden convocatoria de eleccións ante a situación "crítica" de España

O presidente da Xunta, Alfonso Rueda, reclamou, durante a súa intervención na Conferencia de Presidentes a convocatoria de eleccións xerais para "poñer fin á situación que está a vivir España".

Segundo fontes da Xunta, o presidente comezou o discurso en galego para dicir que "Galicia está moi orgullosa de ter unha lingua propia", e continuou a intervención en castelán para ser entendido "sen intermediarios". Alfonso Rueda foi o primeiro mandatario do PP en intervir e pediu un adianto electoral como o resto de compañeiros de partido.

Rueda, entregoulle a Pedro Sánchez unha proposta de real decreto-lei para aprobar canto antes as entregas a conta ás comunidades. O financiamento autonómico foi un dos temas que destacou Rueda na súa intervención nesta reunión, da que dixo que ten que ter o obxectivo de acordar e non quedar "só nunha foto".

En financiamento autonómico, Alfonso Rueda insistiu en que a proposta da condocación da débeda debe ir ligada a un novo modelo de financiamento autonómico e que Galicia"rexeita acordos biltaterais que racharía o principio de igualdade". En materia de vivenda, indicou que a oferta de pacto que fai o goberno é "un xiro respecto á política anterior".

Alfonso Rueda pediu a derrogación de medidas incluídas na lei estatal e coincidiu en que hai que aumentar o investimento, pero con programas "fixados polas comunidades e non impostos". O presidente da Xunta explicou que Galicia xa ten en marcha moitas iniciativas propostas pola Moncloa, como a cualificación permanente de vivenda protexida, e solicita a cesión de pisos desocupados da Sareb para uso social.

Alfonso Rueda xunto ao lehendakari Imanol Pradales na Conferencia de Presidentes

Os presidentes populares piden adianto

Rueda foi o primeiro en reclamar eleccións neste encontro. Logo fixo o propio o andaluz Juanma Moreno, e a cántabra María José Saéz de Buruaga, na orde protocolaria da reunión, segundo a data de aprobación dos seus estatutos de autonomía.

"Sen Orzamentos, sen apoio parlamentario, con gretas no Consello de ministros, co seu partido dividido, e desbordado polas proliferación de casos de corrupción que avergoñan ao país, o presidente do Goberno debe acabar con isto e dar a palabra aos españois", destacan fontes do PP

O PP fixo fincapé en que trece das vinte administracións que sentan na mesa da Conferencia, que representan ao 70 % dos españois, están a pedir a Sánchez que "poña fin a unha lexislatura que nunca debeu empezar nos termos nos que o fixo".

"Hoxe dicímosllo no Palacio de Pedralbes de Barcelona. O domingo dirémosllo na Praza de España de Madrid. Eleccións xa", subliñan coa mirada posta na concentración convocada por Alberto Núñez Feijóo.

Moreno pediu a Sánchez que disolva as Cortes e convoque eleccións ante a situación política “crítica e convulsa” de España.

"Ante a falta de maioría social e parlamentaria" do presidente do Goberno, que é "incapaz" de presentar incluso un proxecto de lei de Orzamentos, xunto coa "crecente desafección e desconfianza na política" existente, Moreno pediulle que disolva as Cortes "canto antes, convoque eleccións e permita aos españois decidir”.

Segundo informaron a EFE fontes do Goberno andaluz, Moreno reclamou tamén que se sometan a votación os acordos que se adopten na reunión deste venres, entre eles as demandas en materia de financiamento autonómico como a convocatoria do Consello de Política Fiscal e Financeira (CPFF).

Tras el, a presidenta de Cantabria, María José Sáenz de Buruaga, pediu eleccións xerais ao considerar que é a "única saída" neste momento a unha situación de "esgotamento, parálise e decadencia institucional".