Suspendida a actividade lectiva en Galicia, pero cos centros abertos: so acudiron o 3% dos alumnos

O conselleiro de Presidencia, Xustiza e Deportes, Diego Calvo, rebaixou a "menos do 3%" os alumnos que acudiron este martes aos centros educativos de Galicia, que permaneceron abertos, pero sen actividade lectiva.

"Como saben vostedes, estaban abertos ao dispor de que se hai algún pai que, como recurso de conciliación, quere deixar alí aos seus fillos, pode facelo. Menos do 3% do alumnado acudiu aos centros, por tanto, utilizáronse bastante pouco", agregou.

A dificultade nas comunicacións que acompañou o apagamento eléctrico que afectou este luns a Península Ibérica, e do que parte do territorio non se recuperou ata as primeiras horas deste martes, traduciuse en confusión para as familias e o persoal dos centros educativos e as escolas infantís da comunidade, sobre todo nas primeiras horas do día.

E é que, nunha comparecencia convocada pouco antes das 21:00 horas, o presidente galego, Alfonso Rueda, anunciou na pasada xornada que se suspendían as clases nos centros educativos e que tampouco habería actividade nas escolas infantís. A determinación da Xunta, en parte pola rede extensa de transporte escolar e con ánimo de aforrar combustible, era pechar os centros.

A decisión adoptouse cando se declarou o nivel 2 de emerxencia e aínda tiña o mando a Administración autonómica, pero pouco despois activouse o nivel 3 e a coordinación pasou a mans do Goberno. A directriz foi que, aínda sen actividade lectiva, reabrisen os centros.

Nesta conxuntura e dado que fallaban os teléfonos móbiles, houbo profesores que non recibiron ata esta mañá as distintas directrices e practicamente á vez: a da pasada noite que determinaba a suspensión da actividade e a instrución que esta mañá clarificaba que debían estar abertos.

O mesmo pasou coas familias: houbo centros privados e concertados que avisaron as familias de que os centros funcionarían e mantiveron mesmo servizos complementarios, como o de comedor.

Pola súa banda, a rede pública autonómica notificou a apertura, sen transporte escolar nin servizo de comedor, dos centros a través da aplicación Abalar, vía habitual de comunicación coas familias. Pero houbo o mesmo problema, as nais e pais recibiron todas as notificacións á vez esta mañá.

En todo caso, os equipos directivos mobilizáronse e desprazáronse aos seus postos de traballo.

Isto non impediu que houbese incidencias puntuais nalgúns casos na entrada dos menores. Xa advertira a Xunta, á vez que pedía comprensión, que podía haber dificultades debido ás dificultades para comunicar as instrucións.

Menús especiais nas escolas infantís

Maior confusión houbo, se cabe, nas escolas infantís, dado que a directriz de reapertura non chegou aos equipos directivos das mesmas ata avanzada a mañá. Houbo pais e nais que se atoparon carteis de "escola pechada ata este mércores" e notificacións de directoras que afirmaban que non se renovaría a actividade ata o día seguinte.

A orde da Administración galega era que as escolas infantís da rede pública autonómica reabrisen na medida do posible ao longo da xornada, pero a súa loxística é, se cabe, máis complicada que a dos colexios, cun punto clave, o da alimentación dos bebés.

Familias consultadas por Europa Press indicaron que as súas garderías, que reabriron esta mañá, optaron por habilitar un "menú de emerxencia", de crema e espaguetis no caso da compostelá de Tras Parlamento, por exemplo. Noutras, a opción máis factible, segundo comunicóuselle aos proxenitores, foron os 'potitos'.